Пандемия салдарынан үш жылдан бері жұмысын тоқтатқан «Қорғас» шекара маңы ынтымақтастығы халықаралық орталығы жақында қайта ашылады. Бұл туралы Жетісу облысы әкімінің баспасөз қызметі хабарлады.
«Өздеріңіз білетіндей, «Қорғас» ШЫХО әлемдегі эпидемиологиялық жағдайға байланысты жұмысын тоқтатқанына 3 жылдан астам уақыт өтті. Осы үш жыл ішінде басқарушы компания орталықтың қызметін жақсарту және барлық бизнес-процестерін жаңғырту бойынша ауқымды жұмыстар атқарды», — деді Жетісу облысы әкімдігінің баспасөз қызметі. «Қорғас» орталығы нақты қай күні есігін қайта ашады? Жетісу облысының әкімдігі 24 сәуірден бастап іске қосылатын орталық екі елдің сауда айналымына айтарлықтай серпін беретініне сенім білдіріп отыр. Сауда орындары орналасқан орталықтағы тауар бағасы нарықтағы құнынан әлдеқайда арзанға сатылады.
