Испаниялық маман Пеп Гвардиола өз командасын Чемпиондар лигасының жартылай финалына он рет шығарған бірінші бапкер атанды.
Сhampionat.com сайтынан алынған мәліметке қарағанда, Чемпиондар лигасы тарихында тек екі жаттықтырушы ғана кемінде тоғыз рет жартылай финалға жолдама алған. Италиялық маман Карло Анчелотти осындай табысқа тоғыз рет қол жеткізген.
Гвардиола Чемпиондар лигасының жартылай финалына «Барселонаны» төрт мәрте (2008/2009, 2009/2010, 2010/2011 және 2011/2012 жылғы маусымдарда), «Бавария» (2013/2014, 2014/2015 және 2015/2016) мен «Манчестер Сити» клубын үш реттен (2020/2021, 2021/2022 және 2022/2023) шығарып отыр.
Гвардиола бапкерлік еткен клубтар үш рет қана («Барселона» 2008/2009, 2010/2011 және «Манчестер Сити» 2020/2021 жылғы маусымдарда) финалға жолдама алды. Испаниялық маман «Барселонамен» бірге екі рет Чемпиондар лигасын ұтты.
Биылғы маусымда Гвардиоланың «Манчестер Сити» клубы Карло Анчелотти жаттықтыратын мадридтік «Реалмен» финал жолдамасын сарапқа салады. Алғашқы кездесу Мадридте «Сантьягу Бернабеу» стадионында 9 мамырда, қарымта ойын осы айдың 17-сінде өтеді.
Екінші жартылай финалда қос миландық клуб «Интер» мен «Милан» шеберлік байқасады.
