Петропавлда «Lada Priora» автокөлігімен жүріп, өткен жылдың қараша айынан осы жылдың сәуіріне дейін жол қозғалысы ережесін 68 рет бұзған жүргізуші анықталды.
Солтүстік Қазақстан облысы полиция департаменті басапсөз қызметінің мәліметінше, Петропавлда «ақылды» бейнекамералардың жұмысын талдай отырып, әкімшілік полиция қызметкерлері қаскүнем бұзушыны анықтады.
Ол шетелдік тіркеуде тұрған «Lada Priora» автокөлігімен жүріп, жарты жылдың ішінде жылдамдықты 68 рет асырып, тоқтау сызығынан өтіп кеткен.
Айыппұлдың жалпы сомасы — 1,5 млн теңге.
Құқық бұзушының деректері бағдарға енгізілді. «МЕГАКАМ.ҚОРҒАУ» қосымшасын пайдалана отырып, оны патрульдік полиция батальонының қызметкерлері тоқтатты.
35 жастағы шетелдікке қысқартылған тәртіппен 700 мың теңгеден астам ақша төлеуге тура келді.
Полицейлердің айтуынша, бұл жалғыз мысал емес.
Жақында Петропавл қаласының полицейлері бір айда белгіленген жылдамдықты 32 рет асырған 22 жастағы жігітті жауапқа тартты.
Саумалкөл елді мекенінде тағы бір жылдам жүруге әуесқой тоқтатылды. Айыртау ауданының 27 жастағы тұрғыны биыл 16 рет жол қозғалысы ережесін бұзған.
Екеуі де ресейлік есепте тұрған «ВАЗ» автокөліктерін басқарған. Олар «ақылды» бейнекамералардың көмегімен анықталды.
«Облыста жол қозғалысы ережесін бұзу деректерін автоматты түрде тіркейтін 35 видеожүйе жұмыс істейді. Аппараттық-бағдарламалық кешендер жол-көлік оқиғаларын жиі тудыратын бағдаршамның тыйым салу сигналына өту, жылдамдық режимін бұзу фактілерін анықтайды. Олар полицияның сенімді құралы, жыл басынан аппараттардың көмегімен СҚО жолдарында 20 мыңнан астам құқық бұзушылық анықталды», — дейді әкімшілік полиция басқармасының бастығы Серік Әлжанов.
ҚазАқпарат
