Мәжіліс депутаты Ұлықбек Тұмашинов шекара маңындағы ауыл халқын ынталандыру бастамасын көтерді.
«Президент Қасым-Жомарт Тоқаев шекаралық аймақтарды дамытудың нақты шараларын қарастыру қажеттігін айтқан еді. «AMANAT» партиясы шекаралық аудандарың әлеуметтік-экономикалық мәселелерін жүйелі шешу керек деп есептейді. Осыған орай, халықты тұрақтандыру, ынталандыру есебінде еңбек етіп жүрген азаматтардың жалақыларына аудандық 1,5 қосымша коэффициент қосу маңызды. Аталған адамдардың еңбек өтілінің 1 жылы 1,5 болып саналуын қарастыру қажет», — деді Ұ.Тұмаршинов Мәжілістің бүгінгі отырысында.
Депутат тек осындай шаралардың арқасында жетіспей тұрған дәрігер, ұстаз, мал дәрігерлері, агроном тағы да басқа жас мамандардың сол аймақтарда тұрақтануын ынталандыруға болатынын айтты.
«Президент Бұқтырма су қоймасы үстінен көпір салуға тікелей тапсырма берді. Бұл көпір, Ертіс өзенінің арғы жағындағы бес шекаралық аудан – Күршім, Қатонқарағай, Марқакөл, Зайсан, Тарбағатай халқының өмір бойғы арманы. Көпір құрылысы қарқынды жүріп жатыр, бірақ биылға бөлінген қаржы көлемі 4 млрд теңгені құрайды. Бұл қажетті қаржының оннан бірі ғана. Халыққа аса маңызды, қажетті, күрделі құрылыс нысанын Үкімет осылай қаржыландырса, Президент тапсырмасы ондаған жылдарға созылып кетеді. Ол кезде айтылған шекаралық бес ауданда халық қалмауы да мүмкін», — деді Мәжіліс депутаты.
