Кентауда тұтынушылары фаст-фудтан уланған дәмхананың қызметкерлерінен сальмонеллез бен стафилококк қоздырғышы анықталды, деп хабарлайды ҚазАқпарат.
Түркістан облысының Санитариялық-эпидемиологиялық бақылау департаменті баспасөз қызметінің мәліметіне сүйенсек, дәмханадағы 2 қызметкерден – сальмонеллез, 6 қызметкерден стафилококк ауруының қоздырғыштары анықталды. Сонымен қатар үй ошағынан алынған 3 чикен өнімінен сальмонеллез табылған.
Кентау қалалық ауруханасының бас дәрігері Асылбек Утебаев дәмханадағы астан уланып, ауруханаға түскен науқастардың барлығы жазылып, үйлеріне жіберілгенін жеткізді. Дегенмен, баршасы учаскелік дәрігерлердің бақылауында болады.
