Семей қаласында бағдаршамның қызыл түсіне өтіп кеткен мас жүргізуші 18 жастағы жігітті қағып, банк ғимаратына соғылды.
Абай облыстық Полиция департаменті баспасөз қызметінің мәліметіне сүйенсек, 25 жастағы семейлік «Toyota Crown» маркалы автокөлігімен алкогольді ішімдік ішкен күйде Б. Момышұлы көшесімен келе жатқан.
«Момышұлы-Уәлиханов көшелерінің қиылысында бағдаршамның қызыл түсіне өтіп кеткен ол, тротуармен жүріп бара жатқан 18 жастағы жаяу жүргіншіні қағып кетіп, одан әрі банк ғимаратына соғылған. Жол апаты салдарынан түрлі деңгейдегі дене жарақаттарын алған жәбірленуші медициналық мекемеге жеткізілді», — делінген ақпаратта.
Тәртіп сақшылары жүргізушіні ұстап, уақытша ұстау изоляторына қамады. Аталған факті бойынша ҚР ҚК-нің 345-бабы 1-бөлігіне сәйкес сотқа дейінгі тергеу амалдары басталды.
ҚазАқпарат
