Орал қаласында автобустың үстіне ағаш құлады, деп хабарлайды ҚазАқпарат.
БҚО ТЖ департаментінің баспасөз қызметінен мәлім еткендей, оқиға 10 шілде күні Сарайшық көшесінде болды.
Сағат 13.45-те №2 бағытпен жүретін автобустың үстіне ағаш құлаған.
Оқиға орнына келген құтқарушылар (4 адам, 1 техника) ағашты кесіп, қоғамдық көліктің үстінен түсірді. Зардап шеккендер жоқ.
БҚО ТЖ департаментінің мәліметі бойынша қолайсыз ауа райына байланысты Орал қаласы аумағы мен оған жақын аудандарда құрғақ шөп пен қоқыс жану деректері жиіледі.
«Өңірде өрт тұтану ықтималдығы жоғары. 10 шілде күні облыстың батысы мен солтүстігінде найзағай ойнап, бұршақ жаууы мүмкін. Ал өңірдің оңтүстігі мен батысында шаңды дауыл тұрады. Желдің екпіні секундына 15-20 метрге дейін жетеді. Облыста 35-39 градусқа дейінгі қатты ыстық сақталады. Осыған байланысты қауіпсіздік ережелерін қатаң сақтап, өрт ошақтары анықталған жағдайда 101 және 112 нөмірлеріне дереу телефон шалу сұралады», — деп хабарлады ведомстводан.
Орал қаласында температура тілі қазіргі кезде 41-42 градусты көрсетіп тұр. Оған күшті жел қосылып, шаһардың кей бөліктерінде жарық та өшіп қалып жатыр
