Петропавлда тұрғындар әлі қоныстанып үлгермеген жаңа үйдің төбесінен су ағып жатыр. Пәтерлер «2026 жылға дейін тұрғын үй-коммуналдық инфрақұрылымды дамыту тұжырымдамасы аясында» мемлекеттік бағдарлама бойынша несие арқылы берілген, деп хабарлайды Azattyq Ruhy.
Тұрғындар бұл баспанадан пәтерлерді «Отбасы банк» арқылы мемлекеттік бағдарлама аясында несиеге алған. Әзірге көшіп кірген жоқ. Бүгін түнде жауған жаңбырдың суы төбеден ағып, жоғары қабаттарды су басты.Олар осы жағдайға шағымданған.
Петропавл қаласының әкімдігі бұл оқиғаға қатысты түсініктеме берді.
«Белгісіз себептермен үйдің техникалық қабатында нөсер кәрізі жыртылып, 2023 жылдың 23 тамызында жауын-шашыннан кейін үйдің жоғарғы қабатындағы пәтерлердің төбесінен су ақты. Қазіргі уақытта «Альфа Север» ЖШС мердігерлік ұйымы нөсер кәрізін қалпына келтіру бойынша жұмыс жүргізді. Сондай-ақ, кепілдік міндеттемелер аясында мердігер ұйым пәтерлердегі су тасқынын жою бойынша жұмыстар жүргізеді. Мердігер ұйымға 2023 жылғы 31 тамызға дейінгі ақауларды жою туралы хабарлама жіберілді», — деп хабарлады қала әкімдігінің баспасөз қызметі.
Мердігер компанияға жұмыстар мерзімінен кешіктірілген үшін айыппұл да салынған.
«2020 жылы пәтерлі үйдің құрылысы басталды. «Альфа Север» ЖШС мердігерлік ұйым болып таңдалды. Үйдің құрылысы 2022 жылы аяқталды және пайдалануға берілді. Сондай-ақ, 2021 жылы аталған үйдің аумағын абаттандыру және инженерлік инфрақұрылым салу бойынша жобаны іске асыру басталды. Абаттандыру жұмыстарының аяқталу мерзімі 15 тамызға жоспарланған болатын. Алайда, «Энерджи-Тараз» ЖШС мердігерлік ұйымының жұмыс кестесінен артта қалу себебінен мерзім өзгерді. Кестені бұзғаны үшін мердігерге айыппұл салынады. Егер жұмыстар осы айдың соңына дейін орындамаса, аталған компанияға оларды жосықсыз деп тану үшін сот процесі басталады. Электр энергиясына келетін болсақ, үйге тұрақты тоқ беріледі. Қазіргі уақытта үйлерге электр энергиясын беру бойынша іске қосу-жөндеу жұмыстары жүргізілуде», — делінген хабарламада.
