Түркістанда түйе сүті құрғақ таблетка болып дайындалады. Бұл туралы Түркістан облысы әкімі Дархан Сатыбалды мен «Golden Camel group LTD» төрағасы Ян Джидің және «Win Lun» компаниясы басшыларының кездесуінде мәлім болды, деп хабарлайды ҚазАқпарат.
Кездесу барысында «Golden Camel» зауытының жұмыс барысы талқыланды. Түйе сүтін өңдеу маусымдық жұмыс болғандықтан, инвесторлар алдымен, дайындық жұмыстарын бастайды. Ал техникалық тексерістен өткеннен кейін бір айда зауыт іске қосылады.
«Түркістанға келгеніме біраз жыл болды. Осында жаңа іс бастап, жұмыс істедік. Сондықтан мен үшін Түркістан әрқашан ыстық. Осы жолы зауытты қайтадан іске қосу үшін келіп отырмын. Техникалық тексеру жұмыстарынан кейін жақын арада кәсіпорынды іске қосуға дайынмын. Түйе сүтінен таблетка шығаруды қолға аламыз. Ешкі сүті Түркістан облысында үлкен сұранысқа ие. Сондықтан осы бағытта да жұмыстарды жандандыруға дайынбыз», – деді «Golden Camel group LTD» төрағасы Ян Джи.
Тәулігіне 100 тонна түйе мен бие сүтін өңдейтін «Golden Camel group LTD» зауытына 7 млрд теңгеден астам инвестиция құйылған. Мұнда ұлттық сусынды соңғы процеске дейін өңдеп, косметикалық өнімдер мен тұрмыстық химиялық сұйықтықтар да шығарады. Өнімнің басым бөлігі шет ел мемлекеттеріне экспортталады. Жобаны іске асыру Түркістан мен көрші Қызылорда, Жамбыл облыстарында түйе шаруашылығын дамытуға және мал басын арттыруға мүмкіндік береді.
