Маңғыстаудағы Ақшұқыр ауылында 145 млн теңгеге сатып алынған өнер мектебі талапқа сай болмай шыққан. Бұл туралы ADILDIK JOLY қоғамдық бірлестігінің филиалынан мәлім етті.
Өнер мектебіне арналған ғимаратты сатып алуға 145 млн теңге жұмсалған.
Мониторинг кезінде еріктілер ғимараттың техникалық талаптарға сай келмейтінін анықтаған.
Техникалық талапта 32 кабинет болуы керек болса, сатып алынған ғимаратта 19 кабинет ғана бар.
Ал мектепте бес санитарлық тораптың біреуі де жоқ. Нысан оқу жылының басында ашылған.
— Орталықтың жұмыс істеп бастағанына бір айдан асты. Онда 500-ге жуық бала қосымша білім алады. Мектепте өрт қауіпсіздігі қамтамасыз етілмеген. Бір де бір өрт дабылы датчигі орнатылмаған, өрт сөндіргіштер жоқ. Біз еріктілермен бірлесіп, мектеп өкілдерінің қатысуымен мониторинг жүргіздік. Нәтижесінде мемлекеттік сатып алу шартының талаптарында көрсетілген бір де бір сәйкестік жоқ екеніне көз жеткіздік, — деді ADILDIK JOLY РҚБ филиалының директоры Асқар Жақсыбаев.
Қоғамдық ұйымның мониторингі барысында анықталған фактілерді растауға сыбайлас жемқорлыққа қарсы іс-қимыл жөніндегі тиісті органдар араласуы мүмкін.
Қазіргі уақытта аудиторлық тексеру тағайындалған.
