Әділет министрі Азамат Есқараев қызметтен шеттетілген сот орындаушылары алименттің ақшасын қалай қолға түсіріп жүргенін айтты.
«Жақында Астанада бұрынғы сот орындаушылары 100 млн теңгеге жуық балалардың ақшасын жеке пайдасына жұмсағаны туралы ақпарат жарияланды. Олар бұл қаражатты қалай ұрлап жүр», — деп сұрады журналист Азамат Есқараевтан.
Министрдің сөзінше, бұл қолданыстағы заңнаманың шикілігнен туындаған мәселе.
«Өте орынды сұрақ. Өзіміз де бұл сұраққа қатты көңіл бөліп жатырмыз. Өйткені бұрынғы заңнама солай жасалған. Яғни сот орындаушылары жиналған ақшаны өз қарамағындағы шотқа жинай алады екен. Ол шотқа ешқандай тыйым салынбайды. Жапа шеккен жасөспірімдердің ақшасын жымқыру деген адам санасына кірмейтін нәрсе. Сондықтан, біздің қызметкерлер осындайларға жол бермес үшін нақты заңға өзгерістерді дайындап жатыр. Жақын арада тиісті органдарға кіргіземіз», — деді ведомство басшысы.
