Бүгін Шымкентте «Republic Day» іс- шарасы аясында жазушы, драматург Қазақстанның құрметті журналисті Захардин Қыстаубайұлының 75 жасқа толған мерейтойы аталып өтті. «Қалам ұшындағы ғұмыр» деп аталған кешке белгілі журналистер, жазушылар, ақындар қатысып, З. Қыстаубайұлының өнегелі өмірі мен елге сіңірген қызметі жайында ой толғады.
—Қазақта «әдемі қартаю» деген сөз бар. Сол сөз қадірлі дос, үлгілі жазушы Захардин Қыстаубайұлына арналғандай. Ол — өзінің көркем мінезімен, салиқалы сөзімен халықтың жүрегінен орын алған, шығармаларында өзекті ой, қоғамдағы қажетті тақырыптарды қозғай білген жазушы. Сондықтан да бүгінгі кеште жазушының шығармалары студенттерге кеңінен насихатталсын деп жастарды шақырдық, — деді жазушы Момбек Әбдәкімұлы.
Кеште Ө.Жәнібеков атындағы ОҚПУ студенттері З.Қыстаубайұлының шығармаларынан үзінді оқып, өз пікірлерін ортаға салды. Әуезді ән мен күмбірлеген күймен өрілген мерейлі мерейтойда З. Қыстаубайұлы шығармашылықтағы қызықты естеліктерімен бөлісіп, жастардың сұрақтарына жауап берді.
Захардин Қыстаубаев – белгілі жазушы, кәсіби журналист. Елімізге баспагер ретінде танымал тұлға. Өзі кітап шығарып қана қоймай, бірқатар әдеби көркем туындыларды редакциялауға күш салып келеді. Шығармаларды өңдеп, баспа бетін көруіне аянбай атсалысуда. Жиында жеті қырлы бір сырлы азаматтың игі бастамалары кеңінен айтылды.
Захардин Қыстаубаевтың есімі шырайлы Шымкент шаһарына ғана емес, егемен елімізге етене таныс. Оның қаламынан туған әңгіме, хикаяттарды телейдың жүрегінен орын алған. Баспасөз бетінде жарық көрген публицистикалық мақалаларын көпшілік іздеп жүріп оқиды. Баспадан шыққан кітаптарын құмарлана парақтайды.
Қаламгер жайлы қатарластарының айтар ойы да терең. Туған еліне қызмет етіп, ауылдастарының мұңын мінбердегілерге жеткзу жолында еткен еңбегі ел жадында. Жиында айтылған ой осыған саяды.
1657 символ
