Ауыл шаруашылығы министрі Айдарбек Сапаров киік етін сату мәселесіне орай пікірін білдірді, деп хабарлайды Kazinform.
«Жалпы, киікпен Экология министрлігі айналысатындығын білесіздер. Таяуда ғана ет комбинаттары айналысатындығы туралы шешім қабылданған болатын. Аңшылық шаруашылығы да айналысады. Ауыл шаруашылығы министрлігі ретінде біздің жұмысымыз — ветеринарлық қауіпсіздікті қамтамасыз ету», — деді министр Үкімет отырысынан кейінгі баспасөз мәслихатында.
Оның атап өтуінше, киік еті жеткізілетін ет комбинаттары анықталған.
«Біз жеті ет комбинатын анықтадық. Ол жерде ветеринарлар бар. Олар өнім сапасының толық сай келетіндігін анықтап, ветеринарлық қауіпсіздікке жауап береді. Ал қайда өткізіп, сататындығымызға байланысты мониторинг жүргізіп жатырмыз. Оны кейін қосымша хабарлаймыз», — деді Айдарбек Сапаров.
