Орал қаласында Дінмұхамед Қонаевтың мүсіні күтімсіздікке ұшырап тұр, деп хабарлайды Kazinform.
Д.Қонаев атындағы қордың төрағасы Нұрлан Ізтелеуовтің айтуынша, аталмыш мүсін қазіргі кезде бұрынғы «Қазақстан» кинотеатрының маңында, Әбілқайыр хан даңғылы бойында тұр.
«Мүсін тұғырының мүжіліп, күтімсіздікке ұшырап тұрғаны рас. Ол маңда ескерткішті күтімге алатын мектеп те жоқ. Сондықтан мүсінді Д.Қонаев атындағы шағынаудандағы алаңға көшіру жөнінде Орал қаласы әкімдігімен келісілген еді. Бұл мәселені тағы да нақтылайтын боламын», деді Н.Ізтелеуов.
Орал қаласы әкімінің баспасөз қызметінен мәлім еткеніндей, Дінмұхамед Қонаевтың мүсіні Орал қаласы мәдениет және тілдерді дамыту бөлімінің «Мәдени-ағарту бірлестігі» МКҚК теңгерімінде тіркелген.
«Мүсінге жақын арада жөндеу жұмыстары жүргізілетін болады. Сонымен қатар мүсінді Д.Қонаев атындағы шағынауданда қазіргі уақытта жөнделіп жатқан алаңға көшіру көзделуде», деп хабарлады ведомстводан.
Айта кетейік, Д.Қонаевтың мүсіні 2015 жылы орнатылған болатын.
