Парламент Сенатының төрағасы Мәулен Әшімбаев Ұлттық қор қаржысын пайдаланудың тиімділігіне күмән келтірді. «Самұрық-Қазына» қорының бағалы қағаздары Қордың ақшасына сатып алынады, нәтижесінде олар тиімсіз болып шығады.
Сенат спикері тәсілдің өзіне емес, жобаларды іске асыру тетіктеріне күмән келтірді.
Ұлттық қордың қаржысын жекелеген стратегиялық инфрақұрылымдық жобаларға пайдалану қажет. Мұндай тәжірибеге тыйым салынбайды. Дегенмен Мәулен Әшімбаевтың пікірінше, облигацияларға қойылатын талаптар мен ережелерді нарық қалыптастыруға тиіс.
«Егер «Самұрық-Қазына» облигацияларды шығарып, оларды нарыққа берсе, олардың қаншалықты орынды және тартымды екенін нарықтың өзі бағалайтын еді. Яғни, нарық баға жоғары емес пе, бәрі пысықталды ма және тағы басқа мәселелердің орынды болуын талап етеді. Біз бұл жерде «Самұрық-Қазына» облигация шығаратын, Ұлттық қор сатып алатын және қандай да бір рәсімдерді оңайлатылған түрде жүргізуге болатын тетікті көріп отырмыз. Осы жобалардың процедуралары мен пысықталуын кім бағалайды? Рәсімдер туралы мәселе Жоғары аудиторлық палатаға жетті ме?», – деп атап өтті Сенат спикері.
Сонымен қатар мұндай қағаздарды Ұлттық қор есебінен сатып алу кезінде Парламентке хабарлау қажет болатын. Алайда олай жасалған жоқ, Сенат төрағасы осыған алаңдаушылық білдірді. Ол, сондай-ақ, пайыздық мөлшерлемені субсидиялау мәселесіне де назар аударды.
«Егер пайыздық мөлшерлемені субсидиялайтын болсақ және бұл шығындарды Ұлттық қор өз мойнына алса, онда Ұлттық қор тұжырымдамасына және балаларды қолдау тұрғысынан орындалуға тиіс міндеттерге және тағы басқа мәселелерге қайшы келеміз. Бұл – екінші мәселе. Үшінші мәселе – есеп беру. Ұлттық қор қаражатын пайдалану тұжырымдамасында «Самұрық-Қазына» облигацияларын қаржыландыру және сатып алу мүмкіндігі көзделген. Өткен жылғы бюджеттің есебі шеңберінде Үкіметтің Парламенттегі есебі де көзделген болатын. Біз былтырғы бюджет бойынша есепті қарған кезде Ұлттық қор қаржысын пайдаланудың осы бөлігі туралы ақпаратты көре алмадық. Ақпарат жоқ. Осылайша, бұл қаржыны пайдалану туралы есепте проблема бар», – деді Мәулен Әшімбаев.
Ол Министрлер кабинетінің мүшелеріне сатып алулар бойынша депутаттар алдында есеп беруге дайын болу керек екенін ескертті.
