Шымкент қаласы Абай ауданы жастар ресурстық орталығының ұйымдастырумен Жол көлік колледжінде «Қаржылық пирамида» тақырыбында пікірсайыс турнирі өтті. Мақсаты – жастар мен жасөспірімдердің бос уақытын тиімді ұйымдастыру, еліне елеулі қызмет ететін болашақ көшбасшыларды дайындау және өзара тәжірибе алмасу алаңын құру. Бұл жайында Шымкент қаласы әкімдігі хабарлады.
Пікірсайысқа Абай ауданына қарасты орта арнаулы оқу орындарының жастары қатысып, қазіргі таңдағы өзекті тақырыптардың біріне айналған — қаржылық пирамидалар жөнінде екі жақты үкімет және оппозиция бағытында тартысты ойын көрсетті. Ойында белсенділік танытқан жастар арнайы алғыс хаттармен марапатталды.
Бұдан бөлек, қалалық Жастар ресурстық орталығының ұйымдастыруымен №46 мектеп-лицейінде «My happy family» тақырыбында семинар-тренинг ұйымдастырылды. Мақсаты – жасөспірімдер арасындағы зорлық-зомбылық пен отбасындағы қыз баласына қатысты тұрмыстық кикілжіңдердің алдын алу.
Кездесу барысында жастарға отбасында орын алатын түрлі психологиялық құбылыстардан туындайтын кикілжіңдер мен ерте жүкітіліктің алдын алу бойынша түсіндірме жұмыстары жүргізіліп, тақырып аясында бейнероликтер көрсетілді.
Сонымен қатар, Жастар ресурстық орталығының ұйымдастыруымен Отырар колледжінің жастары арасында діни танымдығын арттыру бағытында сала маманының қатысуымен түсіндірме жұмыстары жүргізілді. Мақсаты — жастарға діни ағымдардан сақтану туралы терең түсінік беру, ата-ананы құрметтеу, бейбітшілік пен адамдарға жақсылық жасай білудің өмірдегі басты ұстанымы екенін түсіндіру.
Кездесуге Шымкент қаласының дін істері басқармасы «Дін мәселелерін зерттеу орталығы» КММ-нің теолог маманы Дәулетұлы Көбей қатысып, деструктивті діни ағымдардың алдын алу жолдары мен дін бағытындағы бірқатар ақпараттармен бөлісті.
Шымкент қаласы Еңбекші ауданы жастар ресурстық орталығының ғимаратында Саз жен Отырар колледжі студенттері арасында «Адам санасын билеген лудомания» тақырыбында пікірсайыс турнирі өтті. Пікір сайыс алаңында жастар лудоманиядан арылу жолдарының ең тиімді механизмін ұсынып, оның зияндығы мен құмар ойындарға тәуелділікке итермелейтін бағыттар жөнінде сөз етті. Ойын соңында пікірсайысшылар қоғам дертімен бірлесе күресіп, бос уақыттарында осындай пікірсайыс алаңында бас қосуға шақырды.
2000 символ
