«Түркістан Арена» стадионының көгалына бюджет есебінен жылу тартылады. Бұл туралы Түркістан облысының әкімі Дархан Сатыбалды Орталық коммуникациялар қызметінде айтты, деп хабарлайды Kazinform.
«Стадионның құрылысы «Самұрық-Қазына» арқылы жүргізіліп, іске қосылған. Ол жерде «Тұран» футбол клубы орналастырылған. Өздеріңіз білесіздер, бұқаралық ақпарат құралдарына шықты – футбол ойнап жатқанда жаңбыр суы жерген сіңбеген, сондай бір проблемалар болған. Ол жерде түрлі іс-шара жасалса да, ешқайсысы көмектескен жоқ. Ақыры бетіне төселген бүкіл газонды, шымын алып, астына тасталған қабаттарды қайтадан жасап жатырмыз. Оның бәрі 100 пайыз мердігердің есебінен жасалып отыр», – деді облыс басшысы.
Спикердің сөзінше, UEFA-ның талаптарына байланысты 2024 жылдан бастап стадионның астында жылу болуы керек.
«Мердігер осыны бізге жеткізген соң, бюджетте қарадық. Жергілікті бюджеттен арнайы қаржы қойып, шым төселгенше жылу құбырларын тартып жатырмыз. Ендігі жылы іске қосылады», – деді Дархан Сатыбалды.
Сондай-ақ ол Түркістан облысында 7 футбол клубы болғанымен, басымдық «Тұран» клубына берілетінін айтты.
«Біздің негізгі клуб – «Тұран». Соның ғана базасы бар. Одан басқа клубтардың стандарттарға сай базасы болмағаннан кейін бірінші, екінші лигаларда ойнай береді. Премьер-лигада ұстайтын негізгі клуб «Тұран» болады», – деді әкім.
