Былтыр Алматының 159 қаржы ұйымына 189,9 млн теңге айыппұл салынды. Бұл туралы өңірлік коммуникациялар қызметінде өткен баспасөз мәслихатында Қаржы нарығын реттеу және дамыту агенттігінің тұтынушылардың құқықтарын қорғау департаментінің директоры Александр Терентьев айтты.
Спикердің сөзінше, 2023 жылы Агенттікке азаматтар мен заңды тұлғалардан 59 мыңнан астам өтініш түскен.Талдау көрсеткендей, қаржылық қызметтерді тұтынушылардың құқықтарын бұзудың көпшілігі кредиторлардың азаматтардың мерзімі өткен берешегін реттеу бойынша шаралар қабылдамауы туралы болды.
«Анықталған бұзушылықтар бойынша 2023 жылдың басынан бері Агенттік қаржы ұйымдарына қатысты 224 шара қолданып, шамамен 189,9 млн теңге сомасына 159 әкімшілік жаза шығарды. Қаржылық қызметтерді тұтынушылардың құқықтарын қорғау мақсатында 2021 жылғы 1 қазаннан бастап кредиттік ұйымдардың төлемге қабілетсіз қарыз алушы – жеке тұлғалардың берешегін реттеудің бірыңғай заңнамалық тәртібі қолданылады»,- деді Александр Терентьев.
Сарапшы қарыздар мен микрокредиттер бойынша мерзімі өткен жағдайда қарыз алушыларға не істеу керектігін айтып берді.
«2021 жылғы 1 қазаннан бастап Қазақстанда кредитті өтеуде қиындықтарға тап болған азаматтардың проблемалық берешегін реттеу тәртібі қолданылады. Банктер мен микроқаржы ұйымдары (МҚҰ) оны орындауға және борышкерлердің қарыздары мен микрокредиттерін қайта құрылымдауға өтініштерін қарауға міндетті» — деп нақтылады спикер.
