Парламент Мәжілісінің қарауына Қазақстан Республикасының Құрылыс кодексінің жобасы мен оған ілеспе заң жобасы келіп түсті.
«Құрылыс кодексінің жобасы мен оған ілеспе құжат жобасы Мемлекет басшысының Жолдауын іске асыру мақсатында әзірленді. Кодекс сәулет әрі қала құрылысы, сондай-ақ құрылыс саласында жүйелі тетіктерді белгілеуге, құрылыс процесінің барлық кезеңін онлайн режимде бақылауға мүмкіндік беретін eQurylys ақпараттық жүйесін енгізуге бағытталған», — деді депутат Нұртай Сабильянов Мәжілістің жалпы отырысында.
Сонымен қатар, аталған құжат жобасында құрылыс саласындағы рұқсаттардың бірыңғай тізілімін бекіту, сәулет әрі құрылыс қызметіне қоғамдық бақылауды енгізу ескерілген.
«Сондай-ақ заң жобасында құрылыс сапасын арттыру, құрылыс нысандарын пайдаланудың кепілдік мерзімін 2 жылдан 5 жылға дейін ұлғайту қарастырылған. Мәжілістің Экономикалық реформа және өңірлік даму комитеті аталған құжат жобалары бойынша қорытынды әзірлеуге дайын», — деді Мәжіліс депутаты.
