Боран, дауылға қарамастан жолға шығатын автокөлік жүргізушілері әкімшілік жауапқа тартылып жатыр. Бұл туралы Төтенше жағдайлар министрлігі Төтенше жағдайларды жою департаменті бастығының орынбасары Жомарт Асқаров мәлім етті.
«Ауа райының қолайсыздығына қатысты хабарламаларды ескермей жолға шыққан автокөлік жүргізушілері әкімшілік жауапқа тартылады. Оны полиция қызметкерлері атқарады. Алдымен жүргізушіге ескерту жасалады, егер қайталанса айыппұл салынады», — деді Төтенше жағдайлар министрлігі Төтенше жағдайларды жою департаменті бастығының орынбасары Жомарт Асқаров Орталық коммуникациялар қызметі алаңында өткен баспасөз мәслихатында.
Сондай-ақ спикер БАҚ өкілдерінің «Айыппұл қанша көлемде салынады және осы күнге дейін қанша автокөлік жүргізушісі әкімшілік жауапқа тартылды» деген сауалға сол жерде жауап бере алмады.
«Айыппұл көлемі мен саны туралы ақпаратты сіздерге жазбаша жіберейін», — деді ТЖМ өкілі.
