Алматыда бұралқы ит, мысықтарды аулау жұмыстары қалалық ветеринариялық қызметінің диспетчері, 109 біріңғай қызметі, азаматтардың өтінішін қабылдайтын бірыңғай Е-өтініш платформасы мен Алматы әкімдігінің қоғамдық қабылдау бөлмесі Open Almaty-ға келіп түскен өтінімдер негізінде жүргізіледі. Бұл туралы Kazinform тілшісі жіберген сауалға Алматы әкімдігінің берген жауабында айтылды.
Әкімдіктің мәліметінше, Алматыда бұралқы иттерді азайту мақсатында ауланған иттерді аулау, піштіру, вакциналау, босату және асырап алу жұмыстары жүріп жатыр. Бұл жұмыстар тек кинологиялық тесттен өткен иттерге ғана жасалады.
«Мамандар ауланған иттерді клиникалық тексеруден, оба, трихофитияға арналған жедел тесттен және кинологиялық тесттен өткізеді. Ары қарай жануарларды піштіру, вакциналау, сырға салу және арнайы микрочипті енгізу жұмыстары жасалады. Өткен жылы Алматыда 6 900 бұралқы ит пен 229 мысық ауланды. Қазіргі таңда Алматыда қаңғыбас иттерге арналған бір панажай бар, ол панажайда 400 бас итке орын бар. Ол панажайға түскен иттерге жаңа иелер ізделінеді. Егер олар табылмаса, жануарлар сол жерде өмір бойы бағып күтіледі. Өткен жылдармен салыстырғанда Алматыда 2023 жылы қаңғыбас иттердің саны азайған. Жаңа жылдың басынан Алматыда 184 бас қаңғыбас ит ауланды», — деп хабарлады Алматы әкімдігі.
Сондай-ақ әкімдік қалада бұралқы ит, мысықтардың санын азайту бойынша ары қарай қандай жұмыстар жүргізу қажеттігін хабарлады.
«Біріншіден, жануарларға жауапкершілікпен қарау жөнінде қала тұрғындарына үгіт-насихат жұмыстарын нығайту керек. Екіншіден, аулау қызметімен ауланған және қала тұрғындарының үйлерінде ұсталатын жануарларды піштіру жұмысын дамыту керек», — деп хабарлады Алматы әкімдігі.
