Қызылорда қаласындағы Назарбаев Зияткерлік мектебінде облыс бойынша мектеп көшбасшыларының форумы өтті.
Тәжірибе алмасу алаңына аймақтағы жалпы білім беретін мектептердің президенттері, вице-президенттері мен үйлестірушілер жиналды. Назарбаев Зияткерлік мектебінің директоры Жаңбыржан Бекболатов қатысушыларға сәттілік тілеп, көш бастаған оқушылардың мектеп дамуындағы рөлі зор екенін баса айтты.
Форум аясында «Бірлігіміз жарасқан» психологиялық тимбилдингте лидерлер бірлескен іс-әрекеттер негізінде ынтымақтастық пен ауызбіршіліктің үлгісін көрсетті. Ал топтық жұмыс кезеңінде командалар өзін-өзі басқару ұйымдарының моделін құрып, оны дамыту бойынша үздік жобаларымен бөлісті.
– Көптеген идеялар ұсынылды, әрқайсысымыз өзімізге жазып алып отырдық. Бүгінгі алған тәжірибені алдағы уақытта мектептерімізге енгізіп, жаңа бағытта үлкен шабытпен жұмыс істейтін боламыз, – дейді №268 мектептің көшбасшысы Асылзат Нұрғабыл.
Үйлестірушілер үшін NIS белсенділері «Эмоционалды интеллектінің маңыздылығы» тақырыбында тәжірибелік дәріс өткізді және көшбасшылық қасиет пен салалық ерекшеліктерді анықтау жолдарын көрсетті.
– Нағыз көшбасшы өзі дамып қана қоймай, басқарларға үлгі бола білу керек. Топтасып істелінген жұмыс оң нәтижеге алып келеді. Өзін-өзі басқару ұйымының жұмысы мектептің рейтингісін жақсартуға үлкен септігін тигізетіні анық, – дейді С.Толыбек атындағы №3 ІТ мектеп-лицейінің президенті Азат Жұматай.
