Облыстық мәслихаттың кезекті ХІІ сессиясында облыс әкімі Нұрлыбек Нәлібаев жылу желілерін және қазандықтарды жаңғырту мәселесіне тоқталды. Бұл туралы Қызылорда облысы әкімінің баспасөз қызметі мәлімдеді.
«Мемлекет басшысы Қасым-Жомарт Кемелұлы Ұлттық құрылтайдың үшінші отырысында Үкіметке төрт ауқымды инфрақұрылымдық бастаманы жүзеге асыруды тапсырды. Ең алдымен, жұмыс істеп тұрған жылу орталықтарын жөндеу, инженерлік жүйелерді жаңғырту керектігі айтылды. Тозған жылу желілерін азайту үшін жаңғыртудың жоба-сметалық құжаттамасын әзірлеуге, мемлекеттік сараптамадан өткізуге 122,5 млн.теңге қаралуда. Бүгінгі таңда Қызылорда қаласында қуаттылығы 240 МВт болатын жаңа жылу-электр орталығының құрылысы жүргізілуде. Жоспарланған жұмыстар толық жүзеге асуы үшін жаңа жылу-электр орталығына автоматтандырылған газ тарату станциясын (АГТС) орнатып, газ құбырын жеткізуге 925 млн.теңге бөлінуде», – деді Нұрлыбек Нәлібаев.
Облыстық мәслихат депутаттары жылу желілерін жаңғыртуға қатысты жобаларды қолдады.
Жалпы еліміз бойынша жылу электр станцияларының тозу деңгейі 60 пайызға, кейбір облыс орталықтарында 80 пайызға жеткені белгілі. Ал Қызылордада 48 пайызының тозығы жеткен. Былтыр 190 шақырымдық жылу желілерінің 12 шақырымы жөнделген.
«Қызылордажылуэлектрорталығы» мемлекеттік коммуналдық кәсіпорны Сыр өңірін электрмен және жылумен қамтамасыз етеді. Кәсіпорнының баласында 23 энергия көзі бар, оның 2 бу қазандығы және 2 бу турбинасы бар ЖЭО, 3 газ турбиналы қондырғысы және 3 қалдық жылу қазандығы бар КОГТЭС, 7 бу қазандығы бар Оңтүстік қазандық және 19 дербес блок-модульдік қазандық (АБМК).
Кәсіпорынның жылу желілерінің жалпы ұзындығы – 190 шақырым, оның 35,7 шақырымы магистральдық жылу желілері болса, кварталаралық жылу желілері – 154,3 шақырым.
Айта кетейік, облыстық мәслихаттың кезекті XII сессиясында облыстық құрылыс, сәулет және қала құрылысы басқармасының басшысы Ерлан Төралиев, облыстық экономика және қаржы басқармасының басшысы Қамбарбек Мүбәраков, облыс әкімі аппаратының басшысы Шахмардан Байманов, облыстық мәдениет, архивтер және құжаттама басқармасының басшысы Мира Қазбекова, облыстық табиғи ресурстар және табиғат пайдалануды реттеу басқармасының басшысы Серік Сермағамбетов, облыстық жұмыспен қамтуды үйлестіру және әлеуметтік бағдарламалар басқармасының басшысы Ғабит Жаңабаев, облыстық мәслихат депутаты Балжан Шәменова, облыстық мәслихаттың төрағасы Наурызбай Байқадамов баяндама жасады.
