Көктем келісімен жиі өтіп тұратын сенбілікке көбінесе жастар атсалысады. Олар өз қаласының, ауласының қалай тазаланатынын, кімдер тазалайтынын сенбілік арқылы біле түседі.
Түркістан облысы қоғамдық даму басқармасы “Жастар ресурстық орталығы” коммуналдық мемлекеттік мекемесінің ұйымдастыруымен
“Сенбілік — тазалық айнасы” атауымен барлық аудан, қала көлемінде жастар орталықтарының үйлестірумен сенбіліктер өтті.
Сенбіліктің мақсаты — қоршаған ортаны таза ұстауға, экологиялық тазалықты сақтауға атсалысу, туған жерге деген сүйіспеншіліктерін ояту. Сонымен қатар, әрбір азамат облысымыздың тазалығы мен көркеюіне өз үлестерін қосуы міндет. Жалпы аудан, қала көлемінде өткізілген сенбілік арқылы аудан, қала көшелеріндегі тазалықты сақтау және экологиялық мәдениетті қалыптастыру мәселелеріне қоғам назарын аудартуға бағытталған.
Сенбілікке белсенді қатысқан ерікті жастар аудан, қаланың кіреберіс аймағын, орталық көшелер мен әлеуметтік нысандардың айналасын елді мекендердің аумағын қоқыс қалдықтарынан тазартып, экологиялық аймақтардың тазалығын сақтау, су айдындарының арналарын ашу, көше бойларын және арық-атыздарды, бей-берекет тасталған күл-қоқыстарды тазалау, қураған ағаш бұталарын кесу, әктеу, сырлау жұмыстары, талдарды ретке келтіру секілді жұмыстарды жүргізді.
Сонымен қатар, Мақтаарал ауданында “Таза өлке” сенбілік акциясы шеңберінде кенттер мен ауылдық округінде санитарлық тазарту, көркейту және күл қоқыстарды жинау жұмыстары мақсатында ұйымдастырылды.
Қоршаған ортаның тазалығына жауапкершілікпен қарау – әрбір азаматтың басты міндеті. Әрбір тұрғын өзі тұратын үйдің ауласын таза ұстаса, бұл олардың өңір тазалығына қосқан үлесі деп түсіну керек.
1507
