Шымкентте тұрғындар тарапынан жолдардың сапасына қатысты әлі де шағым көп. Әсіресе, әлеуметтік желілерде ойдым-ойдым, шұңқыр жолдарды жөндеу бойынша өтініштер, сыни пікірлер жиі жазылады. Атап айтқанда, қала тұрғындары Қонаев даңғылы, Ерімбетов, Қазиев (Рысқұловтан Арғынбеков көшесіне дейін) көшелері мен А-2 айналма жолында шұңқырларды тезірек жамалып, жөндеу туралы шағымдарын жеткізген. Қазір бұл мәселе қала әкімі Ғ.Сыздықбековтің назарында тұр. Аталған көшелердің жайын біз де көзбен көріп қайттық.
Қонаев даңғылына қатысты мәселе шешімін шапты. Жөндеу жұмыстары жоспарға сай, кезең-кезеңімен атқарылуда. Аталған даңғылдың Жандосов көшесінен Тәжібаев көшесіне дейінгі аралығы (оң жақ бөлігі) наурыз айында жөндеуден өтті. Қазір Желтоқсан көшесінен Тәуке хан даңғылына дейінгі аумағында жөндеу жұмыстары жүргізілуде. Қонаев даңғылы негізгі магистральдық көшелердің бірі болғандықтан, көлік қозғалысы өте жоғары. Құрылыс басында 20 адам жұмыс істеп жатыр.
Аталған орташа жөндеу жұмыстары асфальттың тозған қабатын жаңартуға және жол жамылғысын сақтап, алдағы уақытта көліктердің және жаяу жүргіншілердің қауіпсіз қозғалысын қамтамасыз етуге бағытталған.
Тұрғындар көп шағым айтқан аумақтың бірі – Қазиев көшесі (Рысқұловтан Арғынбековке дейінгі аумақ). Аталған көшеде ойдым-ойдым шұңқырлар халықты әбігерге салып жатыр. Көшені аралау барысында өзіміз де көз жеткіздік. Расында, тезірек жөндеуді қажет ететін нысанның бірі. Тұрғындардың айтуынша, жаңбыр жауса, жол мүлдем көрінбейді. Қыстан бері жол жарылып, шұңқырлар пайда болған.
Шымкент қалалық жолаушылар көлігі және автомобиль жолдары басқармасы қаладағы барлық көшелердің жағдайынан хабардар. Басқарма мамандарының мәлімдеуінше, көшелердің асфальтбетон қабатында қысқы мезгілдегі жауын-шашын салдарынан пайда болған ойық-шұңқырларды жамау жұмыстары жоспарға сай іске асырылуда.
Сапалы жолдар – экономиканың күре тамыры. Қалада орташа жөндеу, қайта құру, жалпы жол құрылыстарында сапаны арттыру бағытында халықпен бірлесе атқаратын жұмыс көп.
Басқарманың мәліметінше, биыл А-2 айналма жолында тегістеу қабатын төсеу, Түркістан, Көшеров, Қазиев, Құртаев, Сіргелі, Бөгет, А-2 айналма жолы, Момышұлы көшелерінде шұңқырларды жамау, Ерманов көшесінде жол белгілерін жаңарту, Бозарық айналма жолында жол белгілерін қалпына келтіру, Орынбаев,Тәшенов көшелерінде жол белгілерін түзету, қайта орнату жұмыстары кезең-кезеңімен атқарылады.
2000 символ
