Алматы облысы Жамбыл ауданындағы жантүршігерлік жол апатынан бір адам жарақаттанып, үш адам қаза тапты, — деп хабарлайды Tengrinews.kz.
4 ақпанда Алматы-Бішкек тасжолының 102-шақырымында жол апаты болды. Алдын ала мәліметтер бойынша Chevrolet Cobalt жүргізушісі жолдың қарсы бағытына шығып, Hyundai Elantra көлігімен соқтығысқан.
Алматы облысы ПД баспасөз қызметі
«Оқиға салдарынан екі жүргізуші мен Hyundai Elantra жолаушысы оқиға орнында қаза тапты. Chevrolet Cobalt көлігінің тағы бір жолаушысы түрлі жарақаттармен ауруханаға жеткізілді», — деп жазылған хабарламада.
Бұл дерек бойынша қылмыстық іс тіркеліп, тергеу жүргізіліп жатыр. Полиция жүргізушілерді жол қозғалысы ережелерін қатаң сақтауға, жылдамдық режимін бұзбауға және жолда аса мұқият болуға шақырады.
