«Астана Концерт» компаниясының продюсері Мәлік Хасенов Астанаға неге дәл Дженнифер Лопестің келе жатқанын түсіндірді. Оның сөзінше, компания Қайрат Нұртас пен Дженнифер Лопестің арасында қиын таңдау жасауға мәжбүр болған, деп хабарлайды Azattyq Rýhy.
«Қиын таңдау болды, Дженнифер Лопесті шақырамыз ба, әлде Қайрат Нұртасты шақырамыз ба деп, қиналдық. Сосын бағаларды зерттей келе, бағасы арзанырақ Лопесті шақыруды жөн көрдік», — деді ол.
Кейін Хасенов өзінің әзілдегенін жеткізіп, концерттің шын себебіне тоқталды.
«Енді қалжыңсыз жауап беретін болсақ, біз жарты жыл келіссөздер жүргіздік. 13 жұлдыздың гастрольдік сапарларын зерттедік. Таңдау барысында әншінің гонорары мен логистика ескеріледі. Егер континентке келу жол шығын арзанырақ болса, сол адам шақырылады. Содан кейін, әрине, әншінің өзі шешім қабылдайды», — деді ол.
Айта кетсек, Астанада 1 тамыз күні өтетін әлемдік әнші Дженнифер Лопестің концертіне билет сағат 11:00-де сатылымға шығуы керек еді. Алайда сатылым басталмай жатыр сайт құлап қалды.
Бұған дейін америкалық супержұлдыздың концерті туралы ақпарат Қазақстанның Үкіметінде талқыланған. Премьер-министр Олжас Бектенов әлемдік деңгейдегі жұлдызды Қазақстанға тартқан «Астана концерт» компаниясын мақтаған еді.
