Қарағанды облысының Кәмелетке толмағандардың істері жөніндегі мамандандырылған ауданаралық соты Абай ауданының Білім бөлімі түсірген талап-арызды қарап, қызын 38 жастағы ер адамға тұрмысқа берді деп айыпталған әйел мен оның азаматтық некедегі жұбайын ата-аналық құқығынан айырмау туралы шешім шығарды. деп хабарлайды Azattyq Rýhy.
Қызы 5 күннен кейін әкесіне қашып барған
Іс материалдарына сүйенсек, әйел азаматтық некедегі күйеуімен бірге 15 жастағы қызын 38 жастағы ер адамға тұрмысқа берген. Жасөспірім небәрі 5 күннен кейін туған әкесінің үйіне қашып барып, болған оқиға туралы полицияға арыз түсірген.
Бұл жайт ҚР Қылмыстық кодексінің «Кәмелетке толмағанның жыныстық тұтастығына қол сұғу» бабымен сотқа дейінгі тергеу жүргізуге негіз болды. Сонымен қатар қыздың ата-анасын ата-аналық құқығынан айыру және алимент өндіру туралы талап қойылды.
Қыздың өзі бастапқы сөзін жоққа шығарды
Сот барысында жасөспірім қыз бұрынғы айтқандарын жоққа шығарып, анасына ренжіген сәтте эмоциямен арыз бергенін айтты. Ол зорлық әрекеттері болмағанын және некеге еркін тұрмағанын растамады.
Сот шешімі: дәлел жеткіліксіз
Сот ата-ананың балалар өмірі мен денсаулығына қарсы қасақана қылмыс жасағаны дәлелденбеді деген қорытындыға келді. Сонымен қатар:
Анасы бұрын ресми некеде болған, ол некеден үш бала туған;
Қазір азаматтық некеде өмір сүреді, тағы екі баласы бар;
Екеуі де сотты болмаған және полиция есебінде жоқ;
Балалардың тұрмыс жағдайы төмен немесе қауіпті екені дәлелденбеді.
Сондай-ақ, үш баланың әкесі ата-аналық құқығынан айырылмаған, және қажет болған жағдайда балаларының құқығын өзі қорғай алады.
Сот талапты қанағаттандырудан бас тартты. Шешім әзірге заңды күшіне енген жоқ.
Оқиға қоғамда резонанс тудырған
Бұған дейін әлеуметтік желілерде 15 жастағы қызды өгей әкесі 38 жастағы ер адамға мәжбүрлеп тұрмысқа берді деген ақпарат тараған. Желі қолданушылары оқиғаға ашынып, қатаң жазалауды талап еткен.
