Астанада жаралы адамды құтқаруға ұмтылып, опат болған жас фельдшер Ұлдана Мырзуанның жұбайы жантебірентерлік жазба жариялады. Дәрігер Әділет Зейнел отбасына тілекші болған халыққа алғыс білдірді, деп хабарлайды Azattyq Rýhy.
«Шаңырағыма сән, тіршілігіме мән болдың… Маңдайыма сыймадың ба, періштем, сен менің мәңгі жүрегімдесің», — деп жазған жарынан айырылған ол.
Дәрігер ендігі жерде тергеудің әділ өтуін қалайтынын жеткізді.
«Ешқандай медаль да, ешқандай сөз де менің жүрегімнің иесін маған қайтара алмайды. Үйіме нұр, құт және береке әкелген, Алла қосқан адал жарымның тілеуін тілеген бүкіл қазақ еліне алғысым шексіз. Осы уақытқа дейін Алладан жүрегімді аман алып қалуын сұрап, қасында болып, дұға еттім. Сабыр сақтап, бәрін сабырға салдым. Ендігі тілегім соттың әділ өтуі, тергеудің таза жүргізілуі. Құдай қосқан қосағымның жаны тыныш болуы үшін бұл істі соңына дейін жеткізуім керек. Жауаптылар жазасын алуы тиіс!», — деді ол.
Кеше Ұлдана Мырзуан ауыр жарақаттан айықпаған күйі аурухана төсегінде қайтыс болды. Марқұм «Ерлігі үшін» медалімен марапатталды.
Еске салайық, 8 қараша күні Астанадағы Тәуелсіздік даңғылында орналасқан тұрғын үйдің кірпіш қасбеті мен кондиционері опырылып түсіп, бес адам зардап шеккен еді. Жарақат алғандар арасында жедел жәрдем қызметінің фельдшері Ұлдана Мырзуан да болған. Ол оқиға орнында зардап шеккендерге көмек көрсетіп жатқан кезде үстіне екінші қабаттағы кондиционер құлап кеткен.
