Бұл туралы журналист Тоқтар Жақаш әлеуметтік желідегі парақшасында жазды, деп хабарлайды Aggregator.kz. «Астанада Мемлекет басшысы Қасым-Жомарт Тоқаевтың қатысуымен парламенттік реформа мәселелеріне арналған Жұмыс тобының отырысы өтті. Президент реформаны жүзеге асыру үшін Конституцияның бірқатар бөлімін қайта қарау қажеттігін атап өтті.
Мемлекеттік кеңесші Ерлан Қарин жүргізілген жұмыстар жөнінде есеп беріп, ұсынылып отырған өзгерістердің ауқымы кең екенін мәлімдеді. Оның айтуынша, бұл бастамалар елдің саяси жүйесін заман талабына сай жаңғыртуға бағытталған.
Президенттің құқықтық мәселелер жөніндегі көмекшісі Ержан Жиенбаев азаматтардан келіп түскен ұсыныстар негізінде жаңа парламенттің құрылымы, депутаттар саны, өкілеттік мерзімі, сайлау тәртібі және заң шығару механизмдері бойынша нақты тәсілдер әзірленгенін жеткізді.
Парламентаризм институтының директоры Наталья Пан eGov және e-Otinish платформалары арқылы саяси партиялардан, үкіметтік емес ұйымдардан және сарапшылардан көптеген ұсыныс түскенін айтты. Жалпы мемлекеттік құрылымды жетілдіруге қатысты 1,6 мыңға жуық бастама қаралған.
Мәжілістегі партия фракцияларының жетекшілері конституциялық реформаның маңыздылығын қолдап, қоғамның бұл өзгерістерге ерекше қызығушылық танытып отырғанын атап өтті.
Отырысты қорытындылаған Президент Тоқаев: «Елімізде жаңа саяси жүйе қалыптасуда. Парламенттік реформаны толық іске асыру үшін Конституцияның бірнеше тарауына өзгерістер енгізу қажет. Ұсынылып отырған түзетулер Қазақстанның шын мәнінде жаңарған Ата заңы туралы айтуға мүмкіндік береді», – деп жазды журналист».
