Беларусь президенті Александр Лукашенко әйелдерге сұлулықты қалай сақтау керектігі жөнінде күтпеген кеңес айтты. Ол бұл туралы кәсіпорын ұжымымен кездесу барысында мәлімдеді.
«Сіздер әдемі болғыларыңыз келеді ғой. Түрлі “химияны” бетке жағып, денеге жағып, балмен сыланып, моншаға барып жүресіздер – мен мұның бәрін білемін, түсінемін. Бірақ сұлулық үшін ең жақсы “бал” — қолыңа күрек алып, қар тазалау. Сеніңіздер: бұл – ең тиімді құрал. Сонда әрқашан жас әрі сұлу боласыздар. Біз, еркектер үшін де қалаулы боласыздар», – деді Лукашенко әйелдерге қарата сөйлеп.
Сондай-ақ Беларусь басшысы жиында отырған шенеуніктерге республикада жарияланған Беларусь әйелі жылы халықтың есінде қалатындай шаралар ұйымдастыруды тапсырды.
«Біз не істеуіміз керек, қандай шаралар өткізуіміз қажет? Ер адамдарға қарамаңыздар. Олар бәрібір өз орнын табады. Біз бәріміз – подкаблучникпіз. Сондықтан ойлаңыздар. Не айтсаңыздар, соны жасаймыз», – деді ол.
Лукашенконың айтуынша, әйелдер бұл жылды ұмытпау үшін аптасына немесе айына кем дегенде бір маңызды іс-шара өткізілуі керек. Себебі «келесі жыл әйелдер жылы болуы екіталай».
Еске салайық, 2019 жылы Беларусьтегі парламент сайлауы кезінде Александр Лукашенко депутаттардың кемінде үштен бірі әйелдер болуы керек екенін айтқан. Оның пікірінше, бұл жағдайда парламент тұрақты жұмыс істеп, ер депутаттар «артық қылық жасамайды».
