Былтыр Алматы облысында Toyota Alphard маркалы көліктердің кесірінен 374 адам жол апатынан қаза тапқан. «AMANAT» партиясы жанындағы Сыбайлас жемқорлыққа қарсы іс-қимыл жөніндегі республикалық кеңестің отырысында жауапты органдар жол апатын азайту үшін қандай шаралар қабылдағаны туралы айтылды, деп хабарлайды Aggregaror.kz Azattyq Ruhy басылымына сілтеме жасай отырып.
«Такси операторлары — Yandex және inDrive компанияларымен бірлесіп, техникалық тексерістен өтпеген көліктер мен рөлі оң жақтағы автокөліктерді, яғни Alphard-ты, такси қызметіне жібермеу туралы келісімге келдік. Мұндай көліктермен такси жүргізушісі болып жүргендер заңсыз жұмыс істеп отыр», — деді көлік вице-министрі Мақсат Қалиақпаров.
Оның айтуынша, мұндай жұмыстар жергілікті әкімдіктер тарапынан да жүргізіледі.
«Көлік тіркелгеннен кейін техникалық тексерістен уақытылы өтуі тиіс. Сонымен қатар, жүргізушілер жылына екі рет медициналық тексеруден өтіп отыруы қажет. Қазіргі таңда пилоттық режимде Астанадағы автобус паркінде онлайн медициналық тексеріс енгіздік, алдағы уақытта оны бүкіл елде таратуды жоспарлап отырмыз», — деді министрдің орынбасары.
Сондай-ақ, республикалық автожолдарда орташа жылдамдық режимі төмендетілген. Нәтижесінде жол апаттарының саны 15 пайызға азайды, деп атап өтті Қалиақпаров.
Ал Мәжіліс депутаты, «AMANAT» партиясы фракциясының мүшесі Ерлан Саиров қазақстандықтар такси қызметі арқылы табыс тауып отырғанын еске салып, шешім қабылдарда олардың да мүддесін ескеру қажет екенін атап өтті.
