Әкім өз мәлімдемесінде алдымен сайлауда қолдау білдіріп, сенім артқан барша тұрғындарға алғыс айтты. Оның айтуынша, халықтың қолдауы үлкен жауапкершілік жүктеген.
«Денсаулығыма байланысты қызметімді тоқтату туралы шешім қабылдадым. Бұл шешім маған оңай тиген жоқ. Біраз уақыт еңбек демалысында болдым. Қызметтік міндеттерімді толық әрі жауапкершілікпен атқаруға денсаулық жағдайым кедергі келтірмеуі үшін осындай қадам жасау дұрыс деп санадым», — деп жазды Әбілқайырұлы.
Арыстанбек Әбілқайырұлы Талғар қаласының әкімі қызметін бір жыл екі ай атқарды. Осы уақыт ішінде қалада әлеуметтік-экономикалық дамуға, инфрақұрылымды жаңартуға және тұрғындардың өмір сапасын арттыруға бағытталған бірқатар жұмыстар жүзеге асырылғанын атап өтті.
Сондай-ақ ол Талғар ауданының әкіміне, әріптестеріне, қала тұрғындарына және ақсақалдарға көрсеткен қолдаулары үшін ерекше ризашылығын білдірді.
«Алдағы уақытта да қаланың дамуына бейжай қарамаймын, тұрғындардың игілігіне бағытталған бастамаларды қолдай беремін. Баршаңызға зор денсаулық, амандық пен табыс тілеймін», — деді ол.
Арыстанбек Әбілқайырұлы Талғар қаласының әкімі болып 2024 жылдың желтоқсан айынан бері қызмет атқарды. Бұған дейін коммуналдық шаруашылық саласында еңбек еткен, жергілікті мәслихат депутаты болған. Отбасында жұбайымен бірге төрт бала тәрбиелеп отыр.
Айта кетейік, Әбілқайырұлы TikTok желісінде жарияланған бейнероликтердің бірінен кейін күтпеген жерден танымал бола бастады. Оның парақшасына тек Талғар тұрғындары ғана емес, еліміздің басқа өңірлерінен де қолданушылар жазыла бастаған.
Бұған дейін шенеунік әлеуметтік желідегі парақшасы арқылы күнделікті жұмыс барысын халыққа жақын көрсетуге мүмкіндік бар екенін айтқан еді.
