Небәрі 15 жастағы қыз. Әлі мектеп партасында отырған бала. Бірақ оның соңғы екі айы түнгі қорқынышпен, бопсалаумен, зорлықпен өткен. Жәбірленуші тараптың айтуынша, оны сегіз бірдей ер адам жүйелі түрде қорлаған. Бұл бір сәттік қылмыс емес – бұл ұзаққа созылған азап.
Қыздың тағдыры онсыз да ауыр болған. Ол ата-анасынан айырылған. Ағасының қолында өсіп жатқан. Ал оны қорлағандар – бөтен емес, өз ауылының адамдары. Яғни, ол қашып құтылатын қауіп емес, күн сайын көретін адамдардан қорыққан.
Оны түн ішінде телефонмен қорқытып шақырған. «Айтамын» деп бопсалаған. Қорыққаннан шыққан. Сол қорқыныш оны қайта-қайта сол түнекке итерген.
Жәбірленушінің айтқан сөздері дан түршіктіреді. Қарсыласқан. Жан ұшырған. Бірақ жауап ретінде шапалақ жеген. Күшпен көлікке өңгерген. Одан кейінгісі – сөзбен айтып жеткізу мүмкін емес, ауыр қорлық.
Бұл жерде ең ауыр сұрақ – неге ешкім оны қорғай алмады?
Ақпарат алдымен мектеп ішінде тараған. Демек, біреу білген. Біреу көрген. Біреу күмәнданған. Мектеп директоры да хабардар болған. Бірақ сол сәтте полицияға хабар берілмеген. Бес күн. Тұтас бес күн үнсіздік бір бүлдіршіннің өмірін тозаққа айналдырған.
Құқық қорғаушы Инга Иманбай бұл туралы ашық айтып, қоғамды дүр сілкіндірді. Оның сөзінше, күдіктілердің арасында мұғалімдердің балалары бар. Бұл ақпарат жағдайды тіпті ауырлата түседі. Себебі бұл енді жай қылмыс емес, ықпал, таныстық, «жабылып кету» ықтималдығы жоғары мәселе.
Ресми мәліметке сүйенсек, іс тек 19 наурызда қозғалған. Қазір сегіз адамның екеуі ғана қамауда. Қалғандары бостандықта. Тергеу жүріп жатыр делінеді.
Бірақ осы жерде қоғамның ішіндегі ашу мен үрей қатар оянады. Өйткені бұл – тек бір қыздың басынан өткен жағдай емес. Бұл – кез келген баланың басына түсуі мүмкін қауіп.
Ең қорқыныштысы – бұл оқиға ұзақ уақыт бойы жұрт назарынан тыс қалған. Қыз жалғыз қалған. Қорыққан. Үндемеген. Ал үлкендер дер кезінде әрекет етпеген.
Бұл үнсіздік – қылмыстың ең қауіпті серігі.
Қазір қоғам бұл істі жіті бақылап отыр. Адамдар әділдік талап етіп жатыр. Себебі мұндай қылмыс кешірілмеуі тиіс. Мұндай жағдай қайталанбауы тиіс.
Бұл – жай жаңалық емес. Бұл – дабыл.
