Түркістан облысының Ордабасы ауданында тарихи-мәдени туризмді дамытуға тың серпін беретін маңызды нысан – «Ордабасы сапар орталығы» пайдалануға берілді. Бұл жоба өңірдің тарихи мұрасын кеңінен насихаттауға, сондай-ақ ішкі және сыртқы туризмді дамытуға бағытталған ірі бастамалардың бірі болып саналады.
Сапар орталығы Ордабасы ауданындағы Бадам ауыл округіне қарасты Ордабасы ұлттық тарихи-мәдени қорығы аумағында орналасқан. Аталған қорық – қазақ халқының бірлігі мен тұтастығын айшықтайтын қасиетті мекендердің бірі. Дәл осы жерде үш жүздің игі жақсылары бас қосып, ел тағдырына қатысты маңызды шешімдер қабылдағаны тарихтан белгілі.
Жобаның негізі 2020 жылы Қазақстан Республикасы Мәдениет және спорт министрлігі қолдауымен қаланып, 2021 жылы құрылыс жұмыстары басталған болатын. Бүгінде толықтай заманауи талаптарға сай жабдықталған орталық ел игілігіне ұсынылып отыр.
Салтанатты ашылу рәсіміне Ордабасы ауданының әкімі Азат Оралбаев қатысып, жаңа нысанның маңыздылығына тоқталды. Оның айтуынша, сапар орталығы ауданның тарихи-танымдық әлеуетін арттырып қана қоймай, келушілерге сапалы әрі жүйелі қызмет көрсетуге мүмкіндік береді. Сонымен қатар бұл нысан өңір экономикасына оң әсер етіп, жаңа жұмыс орындарының ашылуына жол ашады.
Іс-шара барысында мәдениет қайраткері Шахар Қаназарұлы және Өзбекәлі Жәнібеков атындағы Оңтүстік Қазақстан педагогикалық университеті проректоры Исабек Баршагүл сөз сөйлеп, жобаның рухани және ғылыми маңызын атап өтті. Олар мұндай бастамалар жастардың тарихқа деген қызығушылығын арттырып, ұлттық құндылықтарды дәріптеуге ықпал ететінін жеткізді.
Шараға ауданның зиялы қауым өкілдері, білім беру ұйымдарының ұстаздары, Әзірет Сұлтан ұлттық тарихи-мәдени қорық-музейі мен Отырар мемлекеттік археологиялық музей-қорығы қызметкерлері, сондай-ақ мәдениет саласының мамандары қатысты. Бұл өз кезегінде нысанның ғылыми-мәдени маңызын айқындай түседі.
Рәсім барысында орталықтың лентасы қиылып, аудан өнерпаздары концерттік бағдарлама ұсынып, қонақтарға ерекше көңіл-күй сыйлады. Қатысушылар жаңа орталықтағы музей экспозициясын аралап, өңір тарихынан сыр шертетін құнды жәдігерлермен танысты.
Жалпы аумағы 2906 шаршы метрді құрайтын сапар орталығы заманауи инфрақұрылыммен толық қамтамасыз етілген. Мұнда кеңсе бөлмелері, ғылыми кітапхана, конференц залы, 16 орындық жатақхана, экспозициялық залдар мен қор сақтау бөлмелері қарастырылған. Бұл орталық тек туристерге қызмет көрсетіп қана қоймай, ғылыми-зерттеу, білім беру және мәдени іс-шараларды өткізуге де мүмкіндік береді.
Айта кету керек, мұндай сапар орталықтары әлемдік тәжірибеде туристік нысандардың ажырамас бөлігі саналады. Олар келушілерге бағыт-бағдар беріп, тарихи орындар туралы толық ақпарат ұсынумен қатар, сапалы сервис арқылы туристік тартымдылықты арттырады.
Жалпы, «Ордабасы сапар орталығының» ашылуы – Түркістан өңіріндегі туризм саласын жаңа деңгейге көтеруге бағытталған нақты қадам. Алдағы уақытта бұл нысан өңірге келетін туристер санын арттырып, ұлттық тарих пен мәдениетті кеңінен насихаттайтын маңызды орталыққа айналады деп күтілуде.
