АҚШ пен Иран арасындағы текетірес тағы да бір сәтке тежелгендей көрінеді. Бірақ бұл тыныштық – бейбітшіліктің белгісі емес, көбіне дауыл алдындағы ауыр тыныс сияқты. Дональд Трамптың мәлімдеуінше, екі ел арасындағы бітім уақытша ұзартылып, түпкілікті келісімге келмейінше күшінде қалады. Бұл шешім оның Truth Social желісіндегі мәлімдемесінде жарияланды. Сырт көзге бұл – дипломатиялық қадам. Ал тереңірек қарасаң, бұл – әлемдік саясаттағы мәңгілік дилемманың кезекті көрінісі: күш пен келісімнің, сенім мен күдіктің арасындағы үзілмейтін арқан тартыс. Бір тарап тыныштықты қалайды, екінші тарап қауіпсіздікті қарумен өлшейді. Ал шындық, әдеттегідей, осы екі ұғымның ортасында шаршап тұр. Трамптың айтуынша, жағдайдың уақытша жұмсаруы тек Вашингтон мен Тегеранның ғана емес, үшінші тараптың да араласуымен мүмкін болған. Бұл жерде Пәкістан делдал ретінде аталып өтеді. Дегенмен, тарихта делдалдық көбіне мәселені шешпейді, тек оның формасын өзгертеді: ашық қақтығысты кейінге шегеріп, оны саяси күту кеңістігіне айналдырады. Иран ішіндегі саяси ала-құлалық та бұл процестің күрделілігін арттырып отыр. Бір елдің ішкі қайшылығы сыртқы саясатқа айналған сәтте, келісімнің өзі тұрақты шешім емес, уақытша ымыраға айналады. Сондықтан бұл бітім – тыныштық емес, керісінше, кейінгі соққының бағытын анықтап жатқан үзіліс іспетті. Трамп АҚШ әскеріне Құрмыз бұғазы аймағында бақылауды күшейтіп, толық жауынгерлік дайындықты сақтауды тапсырғанын да атап өтті. Бұл – бейбіт келісім мен әскери дайындықтың қатар өмір сүре алатынын көрсететін парадокс. Әлемдік саясатта бейбітшілік көбіне қарудың көлеңкесінде тұрады, ал келіссөздер зеңбіректің үнін естіп отырып жүргізіледі.
Құрмыз бұғазы сияқты стратегиялық нүктелер тек география емес, олар – әлемдік экономиканың тамыр соғысы. Сол тамырдың бір жері қысылса, бүкіл жүйе дірілдейді. Сондықтан мұндағы әрбір шешім тек екі елдің емес, тұтас жаһанның тынысына әсер етеді.
Бірақ ең басты сұрақ өзгеріссіз қалады: бұл ұзартылған бітім шынайы түсіністікке қарай жасалған қадам ба, әлде тек уақытты сатып алу амалы ма? Саясат көбіне осы сұраққа жауап бермейді. Ол тек уақытты созады. Ал уақыт болса, шындықты жасыра да, ашып та үлгереді.
