Түркістан облысында жасөспірімдердің техникалық білімге деген қызығушылығын арттыруға бағытталған маңызды шаралардың бірі – облыстық «IT Jas IQ» робототехника байқауы табысты ұйымдастырылды. Аталған байқау Түркістан облысы қоғамдық даму басқармасына қарасты «Жастар ресурстық орталығы» КММ-нің бастамасымен және Қазығұрт ауданы әкімдігінің қолдауымен өтті.
Іс-шараға өңірдің әр ауданынан келген 8–11 сынып оқушылары қатысып, өзара білім мен шеберлік тұрғысынан бақ сынады. Байқаудың негізгі мақсаты – оқушылардың инженерлік ойлау қабілетін дамыту, заманауи технологияларға қызығушылығын арттыру, сондай-ақ робототехника мен бағдарламалау саласындағы шығармашылық әлеуетін ашу болды. Бүгінде мұндай бағыттағы жобалар цифрлық экономиканы дамытуда маңызды рөл атқаратыны белгілі.
Салтанатты ашылу рәсіміне ҚР Мәдениет және ақпарат министрлігі Жастар және отбасы істері комитетінің басқарма басшысы Мансия Есекеева, Қазығұрт ауданы әкімінің орынбасары Мақсат Беркінбай, сондай-ақ «Жастар ресурстық орталығы» КММ-нің басшысы Ернар Бектаев қатысып, қатысушыларға сәттілік тіледі. Олар өз сөздерінде жастардың техникалық білімге бет бұруы – ел болашағы үшін аса маңызды екенін атап өтті.
Байқау халықаралық FIRST LEGO League Challenge UNEARTHED тақырыбы аясында ұйымдастырылды. Қатысушылар мұхиттарды зерттеу, экологиялық мәселелер және археологиялық жаңалықтар бағытында тың идеялар ұсынып, өз жобаларын қорғады. Бұл тақырып оқушыларды тек техникалық тұрғыда ғана емес, ғылыми-зерттеу бағытында да ойлануға жетелейді.
Жарыс 4 негізгі кезең бойынша өтті. Бірінші кезеңде командалар өздерінің инновациялық жобаларын таныстырып, оның маңыздылығы мен қолдану аясын дәлелдеді. Екінші кезеңде роботтар ойынында 15 түрлі миссияны орындап, бағдарламалау және құрастыру дағдыларын көрсетті. Үшінші кезеңде робот дизайны таныстырылып, техникалық шешімдердің ерекшелігі бағаланды. Ал соңғы кезеңде командалар өзара ынтымақтастық, көшбасшылық және командалық рух сияқты негізгі құндылықтарын паш етті.
Қатысушылар жоғары дайындық деңгейін көрсетіп, күрделі тапсырмаларды орындауда ерекше шеберлік танытты. Нәтижесінде І орын Қазығұрт ауданынан келген Qazygurt командасына бұйырды. ІІ орынды Шардара ауданының Shardara Daryn командасы иеленді. ІІІ орын Қазығұрт ауданының Sunkar Q командасына табысталды. Ал IV орын Созақ ауданының RoboSozak командасына берілді.
Мұндай жарыстардың маңызы зор. Олар оқушылардың тек білімін ғана емес, практикалық дағдыларын да дамытады. Сонымен қатар, командалық жұмысқа бейімдеп, көшбасшылық қасиеттерін қалыптастырады. Қатысушылар үшін бұл – тәжірибе алмасуға, жаңа достар табуға және өз идеяларын кең аудиторияға ұсынуға үлкен мүмкіндік.
Жалпы алғанда, «IT Jas IQ» байқауы – өңірдегі жас таланттарды анықтап, оларды қолдауға бағытталған тиімді алаңдардың бірі. Осындай бастамалар арқылы болашақ инженерлер мен IT мамандардың жаңа буыны қалыптасып, еліміздің инновациялық дамуына үлес қосатыны сөзсіз.
