Түркістан облысының дарынды оқушылары халықаралық аренада тағы бір мәрте жоғары нәтижеге қол жеткізіп, ел абыройын асқақтатты. АҚШ-тың Техас штатындағы Хьюстон қаласында өткен робототехникадан әлем чемпионатында өңір намысын қорғаған команда жүлделі орын иеленді. Ауқымды дода George R. Brown Convention Center көрме орталығында ұйымдастырылып, әлемнің түкпір-түкпірінен келген 50 мыңнан астам қатысушыны біріктірді. Бұл жарыс жас инженерлер мен өнертапқыштар үшін ең беделді алаңдардың бірі саналады.
Аталған дода FIRST Robotics Competition World Championship аясында өтті. Қазақстан құрамасы бұл жолы ерекше табысқа қол жеткізіп, жалпы есепте 12 марапатқа ие болды. Ел атынан рекордтық деңгейде – 225 оқушыдан құралған делегация қатысып, олардың дайындық деңгейі мен бәсекеге қабілеттілігі жоғары екенін дәлелдеді. Бұл нәтиже елімізде STEM-білім беру, робототехника және инженерлік бағыттардың қарқынды дамып келе жатқанын көрсетеді.
Жарыс барысында командалар бірнеше бағыт бойынша сынға түсті. Қатысушылар инновациялық жобаларын ұсынып, роботтарды бағдарламалау мен құрастыру шеберлігін көрсетті, сондай-ақ командалық үйлесімділік пен негізгі құндылықтарды бағалайтын кезеңдерден өтті. Әсіресе «Unearthed» тақырыбы аясында археология саласына қатысты тың идеялар мен технологиялық шешімдер ұсынылып, қатысушылар тарихи мұраларды зерттеудің жаңа тәсілдерін таныстырды.
Түркістан облысынан барған Tolebi Daryn командасы жарыста ерекше көзге түсіп, жоғары нәтиже көрсетті. Команда FIRST LEGO League Challenge (10–16 жас) санаты бойынша әлемнің үздік командаларының қатарына еніп, Champions Award финалисті атанды. Нәтижесінде жүлделі екінші орынды иеленіп, халықаралық деңгейде үлкен жетістікке қол жеткізді.
Бұл жетістік – тек бір команданың емес, тұтас өңірдегі білім беру жүйесінің нәтижесі. Түркістан облысында соңғы жылдары оқушылардың техникалық шығармашылығын дамытуға, робототехника үйірмелерін ашуға және заманауи зертханалармен қамтамасыз етуге ерекше көңіл бөлінуде. Осындай жүйелі жұмыстардың арқасында оқушылар халықаралық жарыстарда тұрақты түрде жоғары нәтижелер көрсетіп келеді.
Жарысқа қатысқан оқушылар төрт негізгі кезең бойынша бақ сынады. Инновациялық жобалар бөлімінде олар өз идеяларын қорғап, ғылыми-техникалық шешімдерінің маңыздылығын дәлелдеді. Роботтар ойынында арнайы тапсырмаларды орындау арқылы бағдарламалау мен инженерлік дағдыларын көрсетті. Робот дизайны кезеңінде құрылғылардың техникалық ерекшеліктері мен тиімділігі бағаланды. Ал командалық құндылықтар бөлімінде қатысушылардың бірлесе жұмыс істеу қабілеті мен көшбасшылық қасиеттері назарға алынды.
Қазақстандық командалардың табысты өнер көрсетуі – елдегі білім беру жүйесінің сапасын, оқушылардың ізденімпаздығы мен жаңашылдығын айқындайтын маңызды көрсеткіш. Түркістан облысының жас дарындары халықаралық деңгейде бәсекеге қабілетті екенін дәлелдеп, болашақта инженерия, IT және жоғары технологиялар саласында үлкен жетістіктерге жетуге әлеуеті зор екенін көрсетті.
Бұл жеңіс жас ұрпаққа үлкен мотивация беріп қана қоймай, елімізде ғылым мен технологияның дамуына жаңа серпін беретіні сөзсіз.
