Алматыда қоғамдық көлікте жол ақысы қымбаттауы мүмкін. Ашық НҚА порталында осындай ұсыныс жазылған әкімдік қаулысы жарияланды.
«Қалалық қатынастарда автомобильмен тұрақты тасымалдауға төлем тәсіліне байланысты сараланатын тариф келесі мөлшерде белгіленсін:
Жол ақысын ұялы байланыс операторының көрсетілетін қызметтері арқылы немесе көлік картасы арқылы немесе мобильді қосымша арқылы қолма-қол ақшасыз төлеу кезінде – 100 теңге, қолма-қол ақшамен төлеу кезінде – 200 теңге», — деп жазылған әкімдік қаулысының-жобасында.
Қазір Алматы қаласында жол жүру құны мобильдік қосымшалар мен арнайы карта арқылы төлейтіндер үшін – 80 теңге, ал қолма-қол ақшамен төлейтіндерге – 150 теңге.
«Соңғы 11 жылда тасымалдаушылардың шығындары барлық баптары бойынша құны айтарлықтай өсті. Мысалы, сол кезде дизель отынының құны 90 теңге болса, бүгінде – 295 теңге. Бұрын газдың құны 33 теңге, қазір – 108 теңге мөлшерінде. Бұл тасымалдаушылардың шығындарын субсидиялау көлеміне тікелей әсер етеді. Мәселен, 2017 жылдан бастап 2022 жылға дейін субсидиялар көлемі 13,8 есе – 6,9 млрд теңгеден 50 млрд теңгеге дейін өсті. Биыл субсидиялаудың болжамды көлемі – бекітілген тарифке сәйкес, шамамен 85,5 млрд теңге. Қоғамдық көліктегі тарифтің қолданыстағы құны сақталған жағдайда субсидиялау мөлшері жылдан-жылға ұлғаятын болады. Ол жергілікті бюджетке үлкен жүктеме түсіреді», — деп түсіндірме берілген қаулы-жобасына.
Мәлім болғандай, егер жол жүру құны 100 теңге мөлшерінде бекітілсе, онда субсидия көлемі шамамен 10 млрд теңгеге қысқарады.
Құжат 21 шілдеге дейін көпшілік талқылауда болады.
