FlyArystan компаниясының Ақтөбе-Ақтау бағытындағы рейсі техникалық себеппен ұшпай қалды, деп хабарлайды ҚазАқпарат.
«FlyArystan 25 шілде күні сағат 10:05-те Ақтөбе-Ақтау КС7777 рейсі техникалық себеппен перронға оралуға мәжбүр болғанын хабарлайды. Ұшу алдын ала Ақтөбе қаласының жергілікті уақыты бойынша 26.07.2023 сағат 01:30-ға ауыстырылды», — деп жазылған әуе компаниясының хабарламасында.
Аталған себептерге байланысты Ақтау-Шымкент КС7576 рейсі жергілікті уақытпен 25 шілде сағат 16:15-ке ауыстырылды.
Шымкент-Ақтау бағытындағы КС7575 рейсі 25 шілде сағат 20:00-ге ауыстырылды.
«Біз жолаушылардан шын жүректен кешірім сұраймыз және ұшу қауіпсіздігі біздің басты міндетіміз екенін хабарлаймыз. Біз осы рейс жолаушыларына мынадай қолдауды ұсынамыз: екі сағаттан артық кешіктірілгенде жолаушылар алкогольсіз сусындармен қамтылады, ұзақтығы бес минуттан аспайтын екі телефон қоңырауын немесе электронды пошта арқылы екі хабарламаны сұратуға құқылы. Төрт сағаттан артық кешіктірілгенде ыстық тамақ беріледі. Сусындар мен тамақтану мәселелері бойынша әуежайдағы FlyArystan өкілдеріне жүгінуді сұраймыз», — дейді компания.
Ұшақ күндізгі уақытта 8 сағаттан артық және түнде 6 сағаттан астам уақыт кешіктірілсе, жолаушылар жатын орын, сондай-ақ тұрғылықты жеріне дейін және кері қарай трансфер сұрай алады.
Ұшу бес сағаттан астам кешіктірілсе, жолаушылар жақын уақыттағы рейске орын болған жағдайда бір тегін қайта брондауды таңдай алады немесе билетін толық қайтара алады.
