Шымкентте Халықаралық студенттер күні қарсаңында Шымкент қалалық ішкі саясат және жастар істері жөніндегі басқарманың ұйымдастыруымен жас командалардан құралған жайдарманшылардың финалдық ойыны өтті. Өнер сайысында он сегіз команда арасынан суырылып шыққан бес команда финалға өтіп, тартысты да қызықты ойын көрсетті.
Аталған жобаның мақсаты – жастардың интеллектуалды ойлау қабілетін арттыру, жастарды ұлтжандылық пен шығармашылыққа тәрбиелеу, жастар арасында мемлекеттік тіл мәртебесін көтеру, елімізде белсенділігі күшейген жобада жастарға қолдау көрсету.
«Жайдарман» ойындарының шығармашылық алаңында жарысқа түскен бес топ белсенді дайындалып келген. Ойыншылардың тауып айтқан әзілдерінің астарынан шынайы өмір шындығын аңғаруға болады. Қағытпа қалжыңмен көрермендерді бір күлдіртсе, тартымды әңгімелерімен ойландырып та қойды.
— «Жайдарман» бізді шыңдайтын, алға қарай жылжуымызға көмек беретін биік белес. Ойын арқылы көптеген жетістіктерге жетіп, жаңа таныстық орнатып келеміз,– деді «Mademuazel» команда капитаны Ділназ Ахметова.
Қазылар алқасы өнерпаздардың сахнадағы мәдениеті мен сөз саптауларын, ойын ережелерін ұстана білуін жоғары бағалады.
— Командалардан финалдық деңгейдегі ойынды көрдік. Әрқайсысы өз образын жақсы алып шығып, ұтымды әзілдерімен күлдіре білді. Ойын керемет болды, – деді «Нысана» театрының актеры Абай Аязбаев.
«Жайдарман» ойындарына қаладағы жоғары және орта арнаулы оқу орындарының жастары қатысты. Ойын ережесіне сәйкес, ойынға қатысу үшін 42 команда өтінім білдіріп, іріктеуден 18 команда өткен болатын. Ал, маусымашар кезеңінен 14 команда 1\4 ширек финалына өтіп, жартылай финалға 8 команда жолдама алған. Жартылай финалда ойын көрсеткен 8 команда ішінен бүгінгі финалдық кезеңде 5 команда ойын көрсетті.
Әділ қазылар қатарында Нысана театрының актерлері , сондай-ақ, ардагер жайдарманшылар төрелік етті. Жастарды қолдау мақсатында аға буын жайдарманшылар қатысушы құрама командаларымен бірге өнер көрсетпек. Солардың бірі «Миллион» құрама командасының актері, жайдарманшы Мансар Орынхан.
Ал, қатысушылар шешуші кезеңде толқу үстінде. Ойында үздік өнер көрсетіп,жеңімпаз атануға сенімдерін үзбейтіндігін айтуда.
Тартысты өткен ойыннан «Mademuazel» командасы көрермен ықыласына бөленіп, жеңімпаз атанды.«Самал-3» жайдарман ойыншылары екінші орын, «Ақбұлақ» жігіттері үшінші орынды алды. Жүлделі орынға ие болғандар арнайы сыйлықтармен марапатталды.
2000 символ
