Ақтөбенің бұрынғы әкімі Ермек Имантаев қылмыстық жауаптан құтылу үшін танысына миллиондар беріп, алданып қалды. Сотта айыпталушы Нұрлан Балтаев процестік келісімге келіп, ісін мойындады, деп хабарлайды Kazinform.
Ақтөбе қалалық сотында Ермек Имантаевты алдап, одан ақша мен компаниядағы үлесін алған Нұрлан Балтаевқа Қылмыстық кодекстің «Алаяқтық» бабы бойынша айып тағылып, іс қаралды.
Мемлекеттік айыптаушы Әсел Таналиева процестік келісімді оқыды.
Іс материалына сүйенсек, 2007 жылы Балтаев ортақ танысы Құдайбергенов арқылы Ермек Имантаевпен танысады. Кейін олардың арасында сенімді қарым-қатынас орнайды.
Имантаев 2019-2021жылдар аралығында «Ақтөбе» ӘКК басқарма төрағасы қызметін атқарды.
Ал 2021 жылы қазан-қараша айларынды ҚР Сыбайлас жемқорлыққа қарсы іс-қимыл агенттігінің облыстық департаменті ҚР Қылмыстық кодекстің 361-бабы және 189-бабы бойынша іс қозғалып, тергеу жүргізді.
Имантаев қылмыстық іс туралы біліп, алаңдап 2022 жылдың көктемінде бәрін танысы Құдайбергеновке айтады. Ал ол Балтаевқа хабарлайды.
— Балтаев бұрын құқық қорғау саласында жұмыс істеген. Ол алдау жолымен ақша жымқыру үшін Имантаевқа Антикор қызметінде танысы бар екенін айтады. 100 млн теңге сыйақы берсе, танысымен сөйлесіп, істі тоқтату туралы келісе алатынын жеткізеді. Өз кезегінде Имантаев Балтаевқа таныстары арқылы ақшаны бөліп-бөліп беруге келісті. Кейін Балтаев келісімді еске салып, қайта-қайта телефон шалып тұрады. 2022 жылдың наурыз айынан бастап 2023 жылдың ақпан айына дейін Балтаевтың банктегі есепшотына жалпы соммасы 2 млн 419 мың теңге түседі. 2022 жылдың 14 наурызы күні Астана қаласында прокуратура Қылмыстық кодекстің 189-бабы бойынша қылмыстық іс қозғайды. 2022 жылдың жазында Имантаев куәгер ретінде, 2022 жылдың тамыз айында осы іс бойынша айыпталушы ретінде тіркеледі. Осы кезде Балтаев тағы да хабарласып, іс қозғалғанын есіне салады, — деді мемлекеттік айыптаушы Әсел Таналиева.
Әрі қарай Имантаев қылмыстық жауапқа тартылмас үшін Балтаевқа «Капитал инвестмент групп» ЖШС-індегі негізгі капиталдың 70% ұсынады.
Оның нарықтағы бағасы 100 млн теңгеден асады. Балтаев оған келіседі.
— 2022 жылдың 27 желтоқсан күні Ақтөбе қаласында Қалиев пен Балтаев сату-сатып алу келісімшартына қол қояды. Сөйтіп Балтаев «Капитал инвестмент групп» ЖШС-нің 70% үлесін алады. Кейін Имантаевқа танысы үшін қолма-қол ақша керек екенін айтып, сатып беруін сұрайды. Имантаев «Капитал инвестмент групп» ЖШС-нің екінші құрылтайшысына қалған 70% сатып алуды ұсынады. Бағасын 50 млн теңге деп бекітеді. Сатып алуға келіскен кәсіпкер ақшаны табу үшін уақыт сұрады. Кейін Имантаев танысы Қалиев арқылы Балтаевқа 4 млн теңге береді. Сол жерде қолхат жазылады. 2023 ақпан айында Имантаев таныстарынан 30 млн теңге қарызға сұрап алады. Балтаевқа 30 млн теңге ақшаны, оған қоса өзіндегі 10 мың доллар қаржыны ұсынады. Балтаев барлығы 36 млн теңгеден астам ақша, 10 мың АҚШ доларын, «Капитал инвестмент групп» ЖШС-індегі 70% үлесін алады. Негізі команияның нарықтағы құны — 178 млн теңге, — деді мемлекеттік айыптаушы.
Прокурор процестік келісімге жасау кезінде 5 жыл бас бостандығынан айырып, «Капитал инвестмент групп» ЖШС-дегі 70% үлесті мемлекет пайдасына тәркілеуді, жазасын қылмыстық атқару жүйесіндегі қауіпсіздігі орташа мекемесінде өтеуді сұрады.
Келесі сот отырысы ертең болады.
