Алматы облысы аумағында «Бақытты және қауіпсіз балалық шақ» жобасы жүзеге асырылып жатыр. Іс-шараны Алматы облысының прокуратурасы Полиция департаментімен және басқа мүдделі органдарымен бірге қолға алған, деп хабарлайды Kazinform.
Облыстық прокуратура мәліметінше, жоба балалардың құқығын қорғауға бағытталған. Негізгі мақсат – зорлық-зомбылық көру қаупі бар немесе оған ұшыраған балаларды анықтау.
«Мобильді топтар бір айда 400-ден астам отбасын тексерді. Оның ішінде полиция және пробация органдарында есепте тұрған тұлғалар, тұрмысы қолайсыз, толық емес және табысы аз отбасылар, сондай-ақ балалар өгей әкелерімен тұратын отбасылар бар. Мысалы, Іле ауданында аштықтан жүдеу, сөйлеуге және жүруге мұршасы қалмаған 6 жасар Ч.М. анықталды. Бала «екі жақты пневмония» диагнозымен жедел түрде аудандық ауруханаға жатқызылып, медициналық көмек көрсетілді», – деп атап өтеді прокуратурадан.
Ведомство мәліметінше, баланың ата-анасы Әкімшілік құқықбұзушылық туралы кодекстің 127-бабының 2-бөлігі бойынша жауапкершілікке тартылды. Сонымен қатар қамқоршылық орган олардың ата-ана құқығын шектеу туралы талаппен сотқа жүгінген.
«Райымбек ауданында 3 баласы аштықтан жүдеген отбасы анықталды. Оларға медициналық көмек көрсетіліп, қысқы қиім сатып алынды. Екі бала жазылған соң балабақшаға, ал үлкені мектеп-интернатқа орналастырылады. Балқаш ауданында 3 отбасында өгей әкелері балаларды ұрып-соққаны анықталды. Полиция органдары кінәлі тұлғаларға қатыcты ӘҚБтК 73-2-бабы (Ұрып-соғу) бойынша әкімшілік құқық бұзушылық туралы іс қозғады», – делінген прокуратура ұсынған мәліметте.
