Жол апатына ұшыраған 28 жастағы жүкті келіншек жедел жәрдем қызметімен №1 қалалық клиникалық ауруханаға жеткізілді, деп хабарлайды Kazinform.
Жол апатының салдарынан пациентте қосарланған жарақат, бас миының шайқалуы, көкірек қуысының қысылуы, қабырғалардың сынуы анықталған. Дәрігерлер науқасқа екі рет күрделі ота жасады.
Операцияның бірінші кезеңінде жүкті әйелдің жамбас сүйектеріне, кейін оң жақ сан сүйегіне және балтыр сүйегіне хирургиялық жолмен бекітуші апаратты қойып берді. Барлық ота сәтті өтіп, дәрігерлер қауіптің алдын алды.
«Аса күрделі отаны №1 қалалық клиникалық аурухананың дәрігер-травматологы академик Асхат Әбдімәуленов және Эльдар Смағұлов жасады. Бес күн жансақтау бөлімінде жатқан науқас палатаға ауыстырылды. Қазіргі уақытта жүкті әйелдің жағдайы қанағаттанарлық. Барлық функционалды және қозғалыс қабілеттері сақталған. Күрделі операцияға қарамастан, жүктілік жалғасуда»-делінген Шымкент қаласы денсаулық сақтау басқармасының баспасөз қызметі таратқан ақпаратта.
