Солтүстік Қазақстан облысында былтыр 219 адам мәжбүрлі түрде маскүнемдіктен емделуге жіберілді, оның 120-сы бұған дейін де наркологиялық диспансерде ем алған.
СҚО Полиция департаментінің бастығы Айдын Қабдұлдиновтың айтуынша, маскүнемдік – қоғамның үлкен проблемасына айналған. Статистика бойынша, қылмыстардың төрттен бірі мас күйде жасалады.
«Алкоголизммен күресу үшін барлық шараларды қолға алып жатырмыз. Соның бірі – маскүнемдерді мәжбүрлі түрде емдету. Бірақ, өкінішке орай, бір адамды бірнеше рет емдетуге тура келіп жатады. Былтыр 200-ден аса адам наркологиялық орталыққа жатқызылса, соның жартысынан астамы ол жерге қайта түскен.
Екінші бағыты – заңсыз айналымнан спирттік ішімдіктерді алу. Былтыр арақ-шарапты заңсыз сатудың 300-ге жуық дерегі анықталып, 12 мың литр алкоголь тәркіленді», — дейді Айдын Қабдұлдинов.
Спирттік ішімдіктер сатып, заңсыз пайда тапқан 559 адам полицейлердің есебіне алынды. Жалпы заңнаманы бұзғандарға 10 мың әкімшілік хаттама толтырылғын.
«Облыста арақ-шараптан толық бас тартқан бес ауыл бар, олар: Тайынша ауданындағы Теңдік ауылы, Айыртау ауданындағы Қарасай батыр және Бірлестік ауылдары, Есіл ауданының Қарағай ауылы және Ғ.Мүсірепов атындағы ауданның Ковыльное елді мекені.
Бұл ауылдарда барлық той-томалақ спирттік ішімдіктерсіз өтеді. Дүкендерінде алкоголь сатылмайды», — дейді департамент бастығы.
Сондай-ақ былтыр көлікті мас күйде басқарған 1164 жүргізуші анықталып, тиісті жазасын алған.
