«Жасыл даму» АҚ басқарма төрағасы Ержан Сәрсенбай орталық коммуникациялар қызметінде өткен брифингіде мемлекет пластик қалдықты өңдейтін кәсіпорындарға қанша субсидия төлейтінін айтты.
«Биыл 1 тонна пластикалық қаптамаға 67 379 теңге төленеді. Оның ішінде алым — 33,4 мың теңге, тасымалдау — 27,3 мың теңге, ал қайта өңдеу — 6,6 мың теңге. 2024 жылы бұл мақсатқа (жалпы тұрмыстық қалдықты қайта өңдеуге — ред.) 7,6 млрд теңге жоспарланған. Жаңа айтқанымдай, төлемдердің бүкіл тарифі нақты белгіленген», — деді Ержан Сәрсенбай.
Сондай-ақ, ол қоқыс өңдеу жобаларына арнайы қор арқылы 3 пайыздық несие берілетінін айтты.
«Қосымша қалдықты жинау және қайта өңдеу технологияларын енгізуге, қайта өңдейтін зауыт салуға, ұйымдардың материалдық-техникалық базасын жетілдіруге арналған жобаларға 200 млрд теңге бөлу жоспарланған. Қаржыландыру „Өнеркәсіпті дамыту қоры“ арқылы 3 пайыздан аспайтын жылдық сыйақы мөлшерлемесімен 3 жылдан 15 жылға дейінгі мерзімде қайтару механизмімен іске асады», — деді акционерлік қоғам басшысы.
