Бүгіннен бастап қалдықты қайта өңдеушілерге «электронды аукцион» принципімен қалдық сатуға мүмкіндік беретін ақпараттық жүйеге тіркелу басталады.
Бұл туралы «Жасыл даму» АҚ басқарма төрағасы Ержан Сәрсенбай орталық коммуникациялар қызметінде өткен брифингіде мәлім етті.
«Бүгіннен бастап EcoQoldau автоматтандырылған жүйесі іске қосылды. Жақын арада өңірлерді материалдық-техникалық жарақтандыруға бағытталған жобаларды қаржыландыру басталады. EcoQoldau қалдықтарды басқару саласындағы бизнес процестерді жеңілдетіп, елдегі экологиялық ахуалға оң әсер етеді. 2021 жылы осы мақсатта 6,1 млрд теңге төленді. Оның ішінде автокомпонеттерді қайта өңдеуге 1,1 млрд теңге, пластик, картон, шыны қаптамаларды қайта өңдеуге 5 млрд теңге төленді», — деді «Жасыл даму» АҚ басшысы.
Сондай-ақ, ол EcoQoldau автоматтандырылған жүйесі арқылы қалдық сату қалай іске асатынын түсіндірді.
«Бірінші жеке немесе зады тұлға мобильді қосымша арқылы жүйеге тіркеліп, жиналған қалдықты сататыны туралы өтінім қалдырады. Одан әрі қалдық жинаушылар өз бағаларын ұсынып, қалдық иесінен оны сатып алады. Жинаушылар ай бойы жинаған қалдық туралы деректі EcoQoldau жүйесіне енгізіп, хабарландыру жариялап отырады. Жинаушылар көңілінен шыққан сатып алушымен келісімшарт жасайды. Одан кейін жинаушы қалдықты тасымалдау жөнінде хабарландыру шығарады. Ал оны кімнің таситынын қалдық иесі дербес таңдап, қалдықты қайта өңдеушіге дейін жеткізу туралы келісімшарт жасасады. Қайта өңдеуші сенімді салмақ өлшейтін құрал арқылы сатып алынған қалдықты қабылдап, тиісті актіге қол қояды. Осыдан кейін қалдықты сатушы мен қайта өңдеуші операторға есеп жібереді. Сол есептің негізінде төлем жасалады. Қалдық сатушы аяқталған айдың есебін келесі айдың 15-іне дейін, қалдық өңдеушілер толған тоқсанның есебін келесі айдың 25-іне дейін жіберуі керек. Бұл процесс ақпараттық жүйеге тіркелген барлық пайдаланушыларға қолжетімді. Баға саясатын нарықтық қатынас реттейді», — деді Ержан Сәрсенбай.
