Премьер-Министрдің орынбасары Тамара Дүйсенова Үкіметтің кеңейтілген отырысынан кейін БАҚ өкілдерінің сұрағына берген жауабында қайта жасақталған Үкімет әлеуметтік саясатты қалай жүргізетінін айтты.
«Президент әлеуметтік төлемдердің көлемін көбейту арқылы халық арасында масылдық қалыптастыруға жол берілгенін айтты. Бұл әлеуметтік төлемдер қысқартылады деген сөз бе?» — деп сұрады журналист.
Вице-Премьер ондай ұстаным жоқ екенін атап өтті.
«Жоқ. Жалпы Президент мемлекеттік көмек мұқтаж азаматтарға берілу керек деген басты қағидатты ұстап отыр. Ол өте дұрыс деп ойлаймыз. Сондықтан бүгінгі таңда әлеуметтік заңнамаларда қарастырылған әлеуметтік көмектердің саны ешқандай кемімейді. Бірақ тағайындаған кезде мұқтаж азаматтарға беру мәселесін, әлеуметтік теңдікті қалыптастыру мәселесін қарастырып отырмыз. Сондықтан біз негізінен келген азаматтар мұқтаж ба, мұқтаж емес пе, соған көбірек көңіл аударамыз», — деді Тамара Дүйсенова.
Үкімет басшысының орынбасары атаулы әлеуметтік көмек алатын халықтың саны кейінгі 3-4 жылда 2 миллионнан 500 мыңға дейін қысқарғанын айтты.
«Естеріңізде болса, бұдан 3-4 жыл алдын 2 млн азамат атаулы әлеуметтік көмек алған. Сонда тексерілген кезде, оның ішінде сіздердің де көмектеріңіз арқылы өте көп азаматтың үй-жайы бар екеніне, табысы бар екеніне көз жеткізген болатынбыз. Қазір бұл мәселе жұмыс істеп жатыр. Бірақ механизмдерін әрі қарай жетілдіреміз. Өткен жылдың есебін қарасаңыз, 500 мыңнан астам адам атаулы көмек алған. Сонда біз және жергілікті мемлекеттік органдар нағыз мұқтаж азаматтардың санатына келе жатырмыз деп айтуға болады», — деді ол.
