Алматы облысы Іле ауданында орналасқан мектептердің бірінде химия пәнінің мұғалімі үйінде дәптерін ұмытып кеткен оқушыға айғайлап, оған қол көтерген. Оқиғаның видеосы әлеуметтік желіге шықты.
Аталған оқиға бойынша Алматы облысы Іле ауданының білім бөлімі түсінік берді.
«Аталған дерек Іле ауданының полиция басқармасында тіркелді, кәмелетке толмаған оқушыға қатысты сот-медициналық сараптама тағайындалды. Қазіргі уақытта мұғалімнің үстінен ҚР ӘҚБтК-нің 73-бабы әкімшілік хаттама толтырылды, сондай-ақ қатаң сөгіс жарияланды. Сот-медициналық сараптама қорытындысы шыққан соң бұл материал әкімшілік сотқа жолданады. Қазіргі уақытта сотқа дейінгі тергеу амалдары жүргізілуде», — деп хабарлады Іле ауданының білім бөлімі.
Алматы облысы полиция департаменті Қосөзен ауылының тұрғынынан 25 қаңтар күні арыз түскенін хабарлады.
«Аталған дерек аудандық полицияда тіркеліп, мұғалім жауапқа тартылды. Сонымен қатар, кәмелетке толмаған баланың ата-анасының дәлелдері бойынша түпкілікті іс жүргізу шешімін қабылдау үшін сараптамалық зерттеулер тағайындалды», — деп хабарлады полицияда.
inform.kz
