Елімізде жастар мемлекет тарапынан қандай қайтарымсыз жеңілдетілген несиелер мен грант алуына болады? Осы мәселе бойынша Қазақстан Халық партиясы ҚБ Түркістан облыстық филиалы дөңгелек үстел жиынын өткізді.
Түркістан облысында жастар саясатын дамыту және жұмыссыздықты азайту мақсатында мемлекет тарапынан қайтарымсыз гранттар және NEET санатындағы жастар үлесін төмендету мен ауыл жастарын қолдау бойынша тыңғылықты іс шаралар атқарылып келеді. Қазіргі таңда басталып жатқан «Zhas Project» жобасы аясында NEET санатына жататын жастарға өз жобасын жүзеге асыруға 1 млн теңге берілмек. Бұл туралы облыстық жастар орталығы басшысының орынбасары Пердебек Сержанұлы толық ақпарат берді.
Одан бөлек, «2021-2025 жылдары кәсіпкерлікті қолдауға арналған Ұлттық жоба» аясында 621 жасқа 2,5 пайызбен 5 млн теңгеге дейін несие берілетін болады. Түркістан өңірінде 2024 жылы 621 жасқа 2,5 пайыздық шағын несие беру жоспарлануда. Жобаларды қаржыландыруға 3,1 млрд. теңге қарастырылып отыр. 2023 жылы түркістандық жас кәсіпкерлердің бизнес-жоспарларын қолдауға 2,9 млрд. теңге бөлініп, өз кәсібін ашуға ниетті 1 мыңға жуық үміткерден өтініш келіп түскен болатын. Облыс әкімінің Қаулысымен құрылған конкурстық комиссияда бизнес-идеялар қаралды.
Нәтижесінде өткен жылы 625 үміткердің бизнес-жобасы мақұлданып, қаражат толығымен игерілді.
Айта кетейік, былтыр ҚР Президенті Қасым-Жомарт Тоқаевтың тапсырмасына сәйкес, 21-35 жас аралығындағы азаматтарға 2,5 пайыздық шағын несие беру бағдарламасы іске қосылды. Жас кәсіпкерлер мемлекеттік бағдарлама аясында мал шаруашылығы жобалары үшін мерзімі 7 жылды, бизнестің басқа түрлеріне 5 жылды құрайтын 5 млн. теңгеге дейін несие ала алады. «Аграрлық несие корпорациясы» АҚ Түркістан облыстық филиалы сенім білдірілген агенттік ретінде бекітіліп, құжаттар қабылдайды.
